ORANJESTAD (AAN) – Den conferencia di prensa na Departamento di Obranan Publico (DOW), e director Ing. Marlon Croes, relaciona cu e edificio di Aduana na L.G. Smith Boulevard y
e plan cu ta andando, el a sigui splica cu na 2021 DOW a traha un “evaluatie matrix” y a haci un evaluacion di tur e opcionnan cu gobierno tin na e momento aki.
Nan tabata tin e momento ey den “pipeline” e opcion di e prijsvraag cu nan tabata tin na 2016 di e diseño, unda cu Lanta Aruba mes lo financia esaki, na e suma di 2016 lo indexer e prijs di 2021. Tambe tabata tin e opcion di renova e kantoor existente na Smith Boulevard cu lo a costa 6.5 miyon florin, y e edificio nobo na 2006 lo a costa gobierno 7.2 miyon florin y si lo indexer su prijs ta sali un tiki mas.
“Pero, 6.5 miyon awe vs un edificio nobo, e ta un suma cu ta indica bo pa mihor traha un nobo, na luga di keda cu esun bieu. Nos tin e opcion di Wind Creek y nos tin e opcion di Bohama, y nos tin e otro opcion pa gewoon basha abao e edificio y traha un kantor nobo eynan unda cu gobierno lo tin cu inverti den dje. Despues di evalua e opcionnan cu mi a caba di describi, e grupo a yega na e conclusion cu e oferta di Bohama tabata esun di mas miho. Pakico? Pasobra den e opcion di Bohama Duana Kantor ta haya un edificio nobo, nan ta bay basha abao esun existente, traha un proyecto nobo den e area ey, stimula vivienda y actividadnan nobo den Caya; y Oranjestad ta loke nos kier stimula den e area y, eventualmente, tambe e lista di DIP pa aanvragen of pa tereno, di e ‘young professionals’ por wordo atende den e proyecto aki tambe”, director di DOW, Marlon Croes a indica.
Pues, a base di esey e grupo a aconseha gobierno pa explora e factibilidad di e proposicion di Bohama.
“Na comienzo di aña, e minister di infrastructura y minister di finanzas, a firma un decreto ministerial pa institui e comision cu ta bay sigui cu e proceso, cual ta consisti di Directie Finanzas, DVZ, DIP, Duana y DOW. E Trabaonan a para pa eleccion y aworaki cu nos tin un gobierno nobo, e minister algun siman pasa a firma un MOU. Esaki ta un acuerdo cu nos ta bay traha hunto pa busca e miho prijs, miho condicionnan y bao ki condicionnan na margen di ley por traspasa y si por yega na un acuerdo cu ta satisfactorio pa gobierno y pa sector priva, pa haci e inversion aki”, Marlon Croes a subraya.
El a señala cu esaki ta e status di e trabao y no tin ningun compromiso ainda cu Bohama ta bay haye. “Nos ta den fase di explora aworaki e proposicion, wak bao ki condicionnan e ta factible, y tine na margen di ley, pa nos por cumpli cu tur e rekisitonan”, Ing. Croes a indica.
