Presidente di CUA, Frans Ponson ta insisti:
- Nan si tin pueblo na pecho
- Pero corda cu prijs na Aruba ta wordo stipula internacionalmente
ORANJESTAD (AAN): Un ponencia cu tin e Comerciantenan Uni Aruba (CUA) hopi cansa y cu nan ta considera preocupante, ta ora cu gobierno, ministernan, ta menciona cu comercio ta hisa e prijs di productonan pa e consumidor. Esaki ta palabranan expresa pa Frans Ponson, Presidente di CUA, den un entrevista cu Matutino DIARIO.
“Ministernan, boso ta politico, si como politico MEP kier insulta AVP y AVP kier insulta MEP, pa e comerciantenan ta ‘djis fine’ pasobra nos no ta mete den politica; esey ta politikeria, bisa ken a hacie bon ken a hacie malo, tur esey ta okay p’afo di nos. Pero ora boso ta touch cu comercio, cu comercio ta abusa di prijs, e ora ey boso ta bay haya tur e comerciantenan ta cuminza share mensahe cu atrobe gobierno ta mete cu nos”, Ponson a relata.
Ponson a bisa cu CUA kier sigura cu, di un manera of otro, gobierno stop di mete cu comercio. “Ora prijs di webo a bay 15 Dollar, prijs internacional, aki 30 florin tur hende a grita. Comercio a busca solucion, nos a sali bay busca webo afo, nos a trece webo bek na 5 florin pa pueblo. E ora ey si nos no a wak ni un mensahe di ningun hende” Ponson a declara.
Ponson a señala cu awe e prijs di webo di Merca ta bek na 5 florin, y e ta hasta mas barata awo.
“Kico esey kiermen? Cu comercio ta busca solucion pa pueblo, pasobra nos si tin pueblo na pecho. Pero nos tin cu corda cu prijs na Aruba ta wordo stipula internacionalmente. Bo no ta haya ni un producto den un supermercado, ni un fruta, cu ta bay keda henter e aña na un prijs, ni un! Pasobra ora haya hopi yobida tin scarcedad y prijs ta bay subi, despues nan ta bay tin di mas den stock y prijs ta bay cay. Pero ora e prijs di e producto ey baha, ni un comerciante aki na Aruba por bay tin’e na prijs halto pasobra e ta morto.”
“Pasobra pa un comerciante sali saca un articulo den media bisa cu e tin’e na 2 florin, tur otro tin’e na 8. E cos ey ta tempo di pasado, anto pa tur hende cu kier bisa cu no ta berdad, cu tin abuso di prijs, mensen boso tur tin un telefon na boso man. Boso tur por controla si e galiña ta mucho caro, trec’e bo mes, lanta bo negoshi, p’esey Aruba tin un mercado free market pa tur hende por lanta loke nan kier. Pero mi ta kere cu pueblo mes compronde esaki miho cu e politiconan, y e politiconan ta hunga politica pa haya voto”, Presidente di CUA, Frans Ponson a remarca.
