Economia di Venezuela ta depende di potentado petrolero mara na Putin --- *Venezuela a bira e centro mundial di Putin y ta peliger pa e region --- *Den situacion mundial explosivo relacion cu Maduro por afecta turismo
ORANJESTAD(AAN)—“Un situacion sumamente peligroso ta persisti den e region di Aruba y awe mas cu nunca, mester ta sumamente cauteloso cu lazonan cu Nicolas Maduro.”
Algun tempo pasa DIARIO a trece dilanti cu Nicolas Maduro ta trata na soluciona su problemanan a base di relacionnan estrecho cu paisnan subversivo.
Informantenan a indica cu e peligro cu ta wordo crea pa Aruba den e desaroyonan actual, ta sigui crece y cu Aruba mester tene na consideracion cu e guera di Ukraine tabata tin resultadonan pisa na Venezuela.
“Lubida e biahe cu nunca Biden mester a permiti pa tuma lugar pa Venezuela. Peliger serio pa henter e region ta sigui crece diariamente, mientras Venezuela ta bira centro di operacion di gobiernonan di mal reputacion cu ta sostene Putin.”
Informantenan a splica cu ora nan papia di “Gobierno peligroso” nan no ta pensa solamente riba filosofia comunista of socialista.
“Nos ta papia di peligroso riba plataforma mundial. Nos ta papia di paisnan conoci como subversivo cu ta destrui orden na otro paisnan,” e informantenan a trece dilanti.
Nan a mustra cu for di mometo cu e Guera na Ukraine a cuminsa, nan a bati alarma pa e forma cu Venezuela a habri porta cierto nacionalidadnan.
“Venezuela no ta e Venezuela cu nos conoce mas. E economia di Venezuela pa un parti grandi ta den man di socionan di Vladimir Putin pero tambe paisnan subversivo cu e industria di petroleo a entrega placa na otro parti di mundo,” a bini dilanti.
Placa peligroso ta wordo hinca den Venezuela cu ta keda den problema serio for di momento cu Chevron no a logra haci milager y crea mas entrada pa Venezuela.
Awor Nicolas Maduro ta papia di e realisacion di dolarisacion mientras Venezuela a bira e centro di reunion pa paisnan Comunista pero tambe paisnan subversivo di cual Putin tambe ta depende.]
Segun informantenan na e momento cu bira conoci cu Aruba ta habri porta pa Venezuela, turismo di Aruba ta na peligro pasobra henter mundo ta conciente di e forsanan di placa di diferente pais peligroso mundialmente y cu paisnan grandi ta rechasa.
Awe Nicolas Maduro lo a reuni cu e Prome Ministro di Cuba cu lo a bay Venezuela pa papia cu Nicolas Maduro na e momento cu inversionnan grandi ta wordo haci na Venezuela dor di cierto pais peligroso na Medio Oriente, cu awe ta e forsa economico di Nicolas Maduro.
“Venezuela no tin nada pa ofrece Aruba cu no ta problema. Den un situacion di guera internacional ta un riesgo mas grandi cu nunca pa habri frontera di e pais no solamente pa hende pober cu lo kier bandona e pais pero tambe simpatisadornan di forsanan subsersivo cu lo bira un peliger pa seguridad nacional di Aruba,” informantenan a conclui.
