Directora di ATA, Ronella Croes:
ORANJESTAD (AAN) – Directora di Aruba Tourism Authority (ATA), señora Ronella Croes, den entrevista cu DIARIO a elabora tocante e sushedad cu tin riba Aruba su beachnan, cu na lugar di merma ta aumentando, no obstante cu ATA, DOW y TPEF a y ta tuma accion, cu awo nan ta bay intensifica.
Croes a comenta cu ATA a bin dilanti cu informacion, entre otro, cu nan a coloca, diferente bari di sushi den e areanan, specialmente den e playanan, y esey tin ainda. “Y tambe nos sa cu ‘Tourism Product Enhancement Funds’ (TPEF) tambe, hunto cu Ministerio di Turismo, a coloca hopi bari di sushi tambe”, Ronella a señala.
Ronella Croes a comparti informacion con ATA ta haci su trabao. Por ehemplo, dos siman pasa ATA a manda dos ekipo riba nos playanan pa asina registra e cantidad di sushi y informa ATA kico ta e situacion.
“No pasobra tabata tin reaccion, pero esaki ta cosnan cu nos ta haci como parti di nos maneho cu nos mes mira y registra, y por raporta na otronan tambe. Pues, esey nos a haci, y nos a constata e mesun conclusion cu enberdad mester mas atencion ainda, fuera di loke tin caba na limpieza”, Ronella Croes a expresa.
Ronella a agrega cu, como tal tambe, e por bisa cu ta intencion di ATA conhuntamente cu DOW y TPEF, pa bay pone mas atencion na esaki, y pa fuera di loke tin, ATA su ekiponan ta haci e playanan limpi, a base semanal.
“Pues ekiponan specializa pa por haci esaki y e santo tambe hacie limpi..Pues, esey ta nos intencion y nos ta trahando riba esaki”, Ronella Croes, CEO di ATA a duna di conoce.
{gallery}No obstante e esfuerzonan di ATA, DOW y TPEF sushi riba beachnan ta aumentando{/gallery}
