Diego de Cuba ta acuerdo pa subi sueldo minimo
- Mustrando cu productonan bendi tur caminda lo subi di prijs
ORANJESTAD (AAN): Diego de Cuba di Sindicato STA, a splica cu nan organizacion tambe a sigui e disertacion di prome minister Mike Eman riba e intencion pa bay hisa e salario minimo actualmente na Aruba, pues kier bay subi esaki den tres fase. E Sindicalista a compronde cu esaki ta 200 Florin pa cada aña.
Riba esaki, De Cuba a indica 2 problema mas grandi na Aruba ora di subi salario minimo. El a bisa: (1) Si bo ta bay subi salario minimo, bo no por lubida e clase media tampoco, pasobra nan tambe ta haya golpi. (2) Si bo bay subi e salario minimo, e ‘cost of doing business’ pa e companianan, pa e comerciantenan ta bay subi, logicamente, pasobra nan contribucion tambe cu nan tin cu bay duna den e prima di pensioen, di AOV, di AWW, di AZV, tur e cosnan ey ta bai aumenta.
Logicamente, e cacho ta dal e pushi, pushi ta dal e raton. Na final di cuenta, e productonan ta haya un chance cu 99.9% di nan tambe lo bay conoce un aumento. Pues, e ora bo tin cu bay evalua si berdaderamente e loke cu bo kier haci eynan ta bay refleha berdaderamente den e trahador.
“Ami ta full mee eens cu mester aumenta sueldo minimo, Sindicatonan ta full di acuerdo cu esey,” Diego de Cuba a declara. Pero no ta esey so, como cu tin di corda riba clase media tambe, pasobra nan tambe ta haya golpi. Segun e Sindicalista, esey no mester wordo lubida. Anto hopi biaha Sindicato STA ta sinti cu e hendenan ey (clase media) ta wordo lubida tur ora. Anto e miedo cu nan tin ta cu, si sigui den e trend aki, lo bo hayabo cu e clase media ta desaparece, anto awo lo bo hayabo cu hende rico y hende pober, y e ora si e pais a coy awa. Pasobra clase media, inclusive, ta bo wes’i lomba di bo pais.
Loke Diego de Cuba ta kere, ta cu tur e gobiernonan cu a sinta a faya den nan maneho, unda a papia hopi, e.o. pa e isla bay diversifica, tin di busca otro manera pa genera otro entrada pa pais Aruba. Anto nos tin un tereno grandi unda antes e Refineria tabata, un tereno cu por haci hopi cos cu ne, pero lamentablemente e no sa si acaso ta rabia hende tin riba San Nicolaas, of ta ki problema nan tin cu San Nicolaas, y nan no kier haci esey.
“Anto un les duro cu Aruba a siña, y nos ta bib’e den pandemia di Covid-19, y e tempo ey nos a haya sa con fragil, con debil, y con pober nos pais ta. Nos tabata den un megadebe, y Covid-19 a dal su tras y nos tabata den problemanan serio, y nos mester a bay bati na porta di Hulanda. Hulanda pone cu cuchiu na nos garganta, bin cu mil y un condicion, Landspakket, casi 7% di interes riba prestamo di tin cu mas cu 900 miyon cu nos a haci, tur e costonan ey,” e Sindicalista a expresa. “Awo laga nos bisa cu 90% di nos economia ta drive riba turismo. Kizas e ta 100% mes, pasobra ta casi tur cos drive riba turismo. Awo un luz mester por cende den bo cabez cu nos mester bay un otro direccion pa nos por genera entrada pa pais aki, sin cu nos ta full dependiente di turismo so. Pasobra nos a wak kico a socede. Y awo aki practicamente, bo ta sinti caba y bo ta mira caba cu Aruba ta un pais chikito, nos ta satura.”
“Den mi concepto personal, nos tin sobre-turismo aki riba caba y nos tin di ta cauteloso, pasobra sobre-turismo por mata bo turismo. Pasobra hope hente, no ta gusta bay un pais, un lugar caminda tin demasiado movimento di hende, nan no por relax, na no por gosa na nan antoho, y nos ta den situacion ey caba.”
Diego de Cuba a finalisa ta puntra: “Ey tin necesidad pa construi mas hotel? No. Pero ey nos ta keda construi.”
