AZV a aclarea: --- *tampoco tin intencion di para e tipo di operacion aki
ORANJESTAD (AAN): OE AZV a tuma nota di e articulo den un medio local “AZV a para tur operacion di stoma’ referiendo na e operacionnan di stoma conoci como gastric bypass. Den dicho articulo ta bisa cu e noticia aki a cay manera un bom pa e specialistanan y pashentnan.
-Posicion
OE AZV ta haya na su luga pa duna su banda di medaya pa asina e informacion ta completo y corecto. Ta asina cu operacionnan di stoma desde algun aña pasa a inicia como un proyecto pilot unda AZV y sector medico kier a confronta e problema di obesidad na Aruba y unda tabata importante pa yuda e aseguradonan cu realmente pa diferente motibo no tabata logra riba nan mes pa baha peso sin embargo si tabata coriendo riesgo halto pa haya malesa cronico, ta haya malesa cronico y of complicacion di e malesa cronico.
-Trayecto prome y despues
Pa un asegurado di OE AZV bin na remarca pa e operacion di stoma mester cumpli na cierto criterio ya cu e operacion no ta un solucion milagroso. E persona cu ta desea pa bin na remarca pa haci e operacion di stoma mester ta un persona cu tin e determinacion y ta disciplina pa haci cambionan drastico den su estilo di bida, tanto prome cu e operacion como despues di e operacion. Adaptacion na habitonan saludabel y nobo ta esencial den e trayecto.
-Situacion actual
E proyecto piloto a bay exitoso, a ranca sali cu algun operacion pa aña y a dicidi cu lo amplia e cantidad di operacion. Sin embargo, ya pa basta tempo, esta prome cu e pandemia di coronavirus a cuminsa, AZV tabata den combersacion cu e specialistanan y Dokter Horacio Oduber Hospital pa un evaluacion di e operacionnan aki. Nan ta mey mey di e evaluacion ey. Meta di e evaluacion ta pa yega na un cantidad aceptabel y pagabel pa Aruba.
