Suzette Dumfries Economista y Antroplogo Psicologico
ORANJESTAD (AAN): Aruba ta haya su mesun plataforma pa hende comun y coriente siña prospera financieramente y crea rikesa. Despues di a forma parti integral di e transformacion impactante di economia di Dubai, esta Suzette Dumfries.
Suzette ta un Economista Cultural y un Antropologo Psicologico. El a dicidi cu su ora a yega pa haci algo back pa su pais y su mesun hendenan.
Cu un trayectoria largo di yuda catalisa crecemento y desaroyo economico na 13 diferente pais, el a haya e oportunidad pa traha e ultimo 27 añanan pa paisnan cu tin un focus grandi, no solamente riba desaroyo economico, pero riba un desaroyo integral cu ta alinea cu e progreso di nan ciudadanonan.
Entre nan el a traha pa e Emirato di Dubai, e Sultanato di Brunei y a lansa compania pa e Sheikh di Qatar.
“Mi a bay studia economia pasobra semper mi tabata fascina pa sa pakico tin hende pober cu ta keda pober y pakico tin hende rico cu ta keda bira mas y mas rico. Kico un grupo ta haci cu e otro grupo no sa?” Asina a sigui studia, analisa, comprende y aplica tur cos cu tin di haber cu e habilidad di hende pa crea, sostene y preserva rikesa.
Esaki ta encera tanto e parti psicologo di crea rikesa, como e practica y principionan di rikeza. Riba dje a studia esaki den contexto di diferente cultura pa comprende con cierto culturanan ta inclui e conocemento over di creacion di rikeza. “Trahando pa companianan renombra y directamente cu Sheiknan y locual mundo ta yama High Net Worth (HNI) Individuals a ponemi den un posicion fortuna di por a siña directamente di nan. Ma siña con nan ta pensa, riba kico nan ta basa nan decisionnan, con nan ta maneha riesgonan financiero, den kico y con nan ta inverti y kico realmente ta contribui na nan resultadonan di crecimento.”
Awor Suzee, manera e ta prefera di worde yama, ta determina pa contribui su conocemento na tanto e pais como nos hendenan. “Mi a traha como adviseur pa hopi gobiernonan rond mundo. Mi por conclui cu ningun pais por desaroya si su hendenan no prospera hunto cu ne. Y ningun hende por prospera sin su mesun participacion consciente.” Esey ta nifica cu desaroyo economico no por keda nos unico focus.
Hopi ta puntrami con mi lo contribui na desaroyo di Aruba. Mi tin planes pa cu esey pero a bira tempo pa nos tur akinan na Aruba siña con nos individualmente por participa den nos mes un progreso individual y familiar. Mi kier focus riba nos mesun hendenan prome. Empodera nan pa crea rikeza, y bira doño di nan mesun futuro financiero.
Temanan cu tin di haber cu crea, sostene y preserva rikesa no ta parti di nos vocabulario y convocacionnan, ni parti concreto di nos cultura. Inverti den stocks, oro, crypto, negoshinan, escala negoshi, crea rikeza, preserva rikeza. Tur ta temanan cu mi kier mira cosnan cu ta bira normal pa cada hende comun y coriente.”
Pesey el a dicidi di lansa su plataforma na Aruba. “Den e mundo aki, e color preto, esta Black, ta simbolisa nos aspiracionnan di mas grandi. Black Tie. Black Dress. Black Card, Black Belt. M’a tuma tur mi conocemento y experiencia y mi pasion pa empodera mi isla, y a crea e concepto di Black Wealth. E aspiracion mas halto pa cu nos resultadonan financiero.”
A base di e concepto ey lo introduci varios Masterclass, programa nan di estudio y eventonan pa empodera y siña hende comun con nan por crea resultadonan financiero miho pa nan mes y experiencia bida den su totalidad.
“Mi ta bay enfoca riba Oranjestad y San Nicolas prome ora mi organiza mi eventonan cuminsando 24 di September na Oranjestad y 1 October na San Nicolas. Pa awor mi deseo ta pa tur hende bin, sin cu mi mes tin metanan di ganashi.
Tur locual mi cobra na prome instante lo ta simplemente pa cubri gasto solamente. E meta ta pa realmente empodera hende. Esey ta e parti di desaroyo economico cu pa mi no ta suficientemente cubri akinan na Aruba. Y embes di papia, ami kier tuma accion. Aruba merece”. Su plataforma tin e nomber di The Black Wealth Club, y segun Dumfries, el a dicidi di yame asina pasobra pertenece na ‘The Club” Semper tabata pa hende privilegia.
Mi kier e hende comun y coriente awor tin su club unda nan por siña, discuti y aplica tur locual lo yuda nan crea, sostene y preserva rikesa.
