Partido MEP ta convenci cu Minister Dowers ta gaña:
ORANJESTAD (AAN): Reaccion di Partido MEP ta simple: Unico cos cu Arthur Dowers mester haci ta respeta ley y regla! Den e ultimo dianan aki comunidad por a scucha Minister Dowers y e media cu e ta paga, constantemente ta demonisa miembronan di hunta di comisarionan di tur forma. Ademas di demonisa, ta gaña constantemente.
Pa cu esaki ta ata aki un analisis di e hechosnan pa bo mes saca bo conclusion.
Instancianan international manera OECD, IMF, WorldBank a crea reglanan di CORPORATE GOVERNANCE pa protehe e interes di companianan estatal, contra metemento politico. Esaki pa motibo cu den pasado tur loke ta metemento politico, nombracionnan politico, y favorecemento politico a causa dañonan severo na companianan estatal. Y na Aruba esaki tambe ta e caso.
Den pasado un investigacion forensico riba tanto e companianan RdA y Utilities Aruba a mustra con Gabinete Eman 1 y 2 a uza e companianan aki pa nan antohonan politico, y a neglisha interes di e companianan. Pa menciona algun ehempel: hedging cu a costa nos comunidad centenares di miyones, proyectonan fantasma y fracasa di Ecogas y fly wheel, cu apesar cu a fracasa, comunidad si mester a paga e gastonan den nan tarifa di awa y coriente. Esakinan ta solamente un par di ehempel mirando cu tin hopi mas.
P’esey den e ultimo 8 añanan, gobierno a traha riba reglanan di CORPORATE GOVERNANCE y a laga un ley practicamente cla. Lamentablemente e gobierno nobo di AVP/Futuro kier bolbe haci y deshaci, y no kier manda e ley pa Parlamento, cu e meta pa duna nan mas tempo pa nan antohonan den e companianan estatal. Algo cu sigur por haci dañonan grandi un biaha mas na comunidad.
Loke e reglanan internacional ta stipula: E reglanan di Corporate Governance ta pone cu gobierno no por mete den e companianan estatal.
Pa sigura interes di comunidad, miembronan di hunta di comisario ta wordo poni eynan pa un periodo specifico, cu e tarea pa controla maneho di e compania. Nan por wordo kita pa un gobierno (shareholder) na momento cu e periodo caba of si en caso nan no ta funciona manera mester ta. Si nan ta funciona bon, y nan periodo no a yega ainda, gobierno no mag di kita nan. Si gobierno dicidi di kita nan toch, lo mester paga nan un suma financiero.
Pakico mester paga un suma si kier kita e hunta di comisario sin motibo: Internacionalmente esaki ta un recomendacion pa asina stroba gobierno di haci metemento politico den e companianan. Kita un miembro pa motibo politico ta wordo considera algo totalmente inaceptable den mundo internacional. Y ta pesey OECD, IMF, WorldBank tur ta stipula pa paisnan tuma tipo di areglo monetario y multa, den nan acuerdonan cu miembronan di hunta di comisario.
Den caso specifico di Aruba: Ningun miembro di board di AWSS a exigi pago di ningun suma. Loke cu SI a pasa ta exactamente locual cu internacionalmente ta wordo condena: e gobierno nobo kier kita tur miembro di e huntanan, pa apunta hendenan di reputacion dudoso, cu ta solamente leal na AVP. Awendia esaki no ta bai asina facil mas
Banconan a bati alarma contra e accionnan aki di gobierno. Banconan cu tin fiansanan grandi cu e companianan aki, ya a bati alarma caba na gobierno cu nan tampoco ta acepta loke gobierno kier haci. Hasta lo bai over na cobra e companianan multa pa motibo cu a kita hende drechi y pone hende di reputacion dudoso cu e banconan a rechasa.
Pues Arthur Dowers y su media liga ta gaña. Y loke nan ta purbando, ta demoniza hende drechi, pa e berdad no sali na cla.
No cay den nan trampa, nos conoce nan caba como manipulado, y asina cu bo scucha cosnan asina, puntra bo mes kico nan kier sconde.
