Na 2019 un San Nicolas herida a presenta su problema na Prome Ministro --- *Na 2021 optimismo ta briya cu cumplimento di un promesa gubernamental --- *Democracia a resalta na San Nicolas cu a ricibi resultado di bon gobernacion
ORANJESTAD (AAN) — Kico ta democracia? Kico ta un Gobierno di Pueblo cu ta traha na interes di Pueblo?
Den mundo politico hopi bez democracia ta haya interpretacionnan cu politiconan kier duna na e palabra Griego.
E unico interpretacion valido di democracia ta, cu e ta defini e forma politico di un Gobierno di Pueblo.
Ora papia di un Gobierno di Pueblo, ta papia di un gobierno cu Pueblo ta eligi y cu debi na esaki mester traha na interes di Pueblo.
Democracia a resalta na momento cu Prome Ministro Evelyn Wever-Croes a bolbe San Nicolas y hunto cu e comerciantenan di San Nicolas a papia di e realidad di e parti di Aruba, cu mas a sufri ora e proyecto di Citgo no a bira realidad.
San Nicolas tabata e parti di Aruba cu directamente a wordo afecta dor di e hecho cu Gobierno Mike Eman no a realisa e proyecto, cu segun a wordo bisa na 2016 lo a trece un crecemento economico di 15 porciento pa e pais.
For di momento cu a firma e contracto cu Citgo, henter mundo a adverti pa e peligro pa firma un contracto pa e compania, cu tabata wordo uza dor di Nicolas Maduro, e dictador di Venezuela, cu tabata uza Citgo como su baca di lechi y a laga Citgo den estado di bancarota.
No ta sin mas Prome Ministro Wever-Croes a kita e yabi di refineria for di Citgo, cu a cambia di destino ora Gobierno di Nicolas Maduro mes a splica Aruba na careda, cu e no por a realisa e proyecto despues cu Citgo a cay den man di Guaido, cu te awe ta e grupo cu tin Citgo na Merca, cu ta nenga gobierno di Nicolas Maduro pa mishi cu e placanan.
Na momento cu a kita e yabinan di refineria di Aruba for di Nicolas Maduro, Aruba por a habri porta pa desaroyo di San Nicolas.
Kico esaki ta nifica a keda demostra na momento cu Prome Ministro Wever-Croes a bolbe San Nicolas awor como cabesante di Gabinete Wever-Croes 2 y a entrega na comerciantenan di San Nicolas e futuro nobo cu a wordo alcansa pa e centro comercial.
Cu entusiasmo San Nicolas a reacciona y comerciantenan a expresa nan certeza den un mihor futuro, cu ta basa tambe riba e proyectonan cu Prome Ministro Wever-Croes a alcansa pa Aruba den un tempo cu Aruba mester a zink den e olanan di e pandemia Covid-19 cu a anuncia su mes den e crisis financiero cu Gobierno Mike Eman a laga atras.
Un San Nicolas yena cu optimismo na 2021 a papia di e futuro nobo cu a wordo alcansa pa Prome Ministro Wever-Croes di acuerdo cu e Masterplan cu a wordo introduci for di 2020, ora Aruba mester a confronta un crisis mundial.
San Nicolas ta prueba di e trabou cu a wordo haci dor di Prome Ministro Evelyn Wever-Croes kende a haci cu Aruba por a drenta 2021 cu e certeza cu e por recupera di e desastre economico financiero y social cu e pais a conoce for di 2014 ora Hulanda a deshaci di Status Aparte y despues a wordo complimenta dor di Covid-19 na 2020.
Awe na San Nicolas prueba ta entrega di e realidad, cu Aruba den pleno crisis financiero y crisis di Covid-19 a haya aliento nobo na man di un lider historico, Evelyn Wever-Croes!
