Pesey tambe a organiza 'Job Fair'
ORANJESTAD (AAN): Manera DIARIO a trece dilanti, na luna di Juni cu a pasa, e organizacion local di Aruba Food & Beverage Association a tene un Job Fair cu tabata destina pa purba na haya mas trahador posible pa e sector di cuminda y bebida na Aruba.
Tin hopi vacatura, y pesey e asociacion di AFBA a organiza esaki pa un periodo di 9 ora largo den Renaissance Conference Center. Mas di 40 compania tabata presente, como cu en total tin alrededor di 200 cupo di trabao disponible.
Carolina Merryweather-Raven di Asociacion AFBA a mustra cu en total 500 persona a acudi na e Job Fair aki.
DIARIO a mustra den edicion di Diahuebs caba, cu e companianan ta hayando problema ora di yama e aplicantenan aki. Sea nan no ta contesta telefon, y no ta responde na mensahenan via email.
E problema di scarcedad di trahador ta sigui! Segun Merryweather-Raven, e ta sigui di ta algo preocupante pa esnan den Food & Beverage.
Pa colmo, ora cu den caso di urgencia un Restaurant of Bar mester di ayudante extra debi cu empleado ta malo, semper ta acudi na diferente compania di tipo di Temporary Manpower, Uitzendburo’s, cu tin hende riba contract pa yuda den esey. Ta sali na cla cu nan tampoco no tin trahador disponible!
Pues ora bo ta yama un Uitzendburo y ta pidi nan yudanza como cu tin un p.e. Cookhelper malo na cas y tin mester di uno pa val-in, nan ta bisabo cu nan no tin.
Pesey e Asociacion AFBA ta bay tene reunion cu tur compania di Temporary Manpower pa check di con na tambe tin e problema aki. Pasobra den pasado esaki no tabata un problema na Aruba!
E industria di Restaurant y Bar na Aruba cueste loke cueste kier duna trabao na nos localnan. Ningun tin tempo pa bay deal cu situacion y papeleo cu gasto pa permiso pa busca trahador stranhero, of e proceso largo di DPL, cu no ta funcionando pa nan. Pero e companianna nan no tin otro manera, y ta obliga di bay drenta y confronta e obstaculo ey, pa busca permiso pa asina trece toch cierto posicion.
“Si nos no ta hayando cleaners, y e ta un problema persistente den e trahadornan local na Aruba”, segun Merryweather-Raven, e ora nan ta kere cu sigur e momento a yega pa cuminza duna permiso pa manda busca trahador di exterior pa bin haci e trabao di cleaner.
E fluho grandi di turistanan e lunanan aki na Aruba, ta mustra claramente cu e industria a crece bek. Pero e procesonan legal ta tumando demasiado tempo. Hasta esnan cu tey na Aruba caba como cleaner pa varios aña caba, tin di bay renoba nan permiso, pero esaki ta unda cu tur cos ta keda pega.
AFBA hunto cu mas gremionan ta discutiendo y buscando solucion pa e problema di scarcedad di trahador. Nan kier bin cu un solucion, y tabatin hasta contacto cu Ministro di Turismo y Ministro di Labor riba e topico aki.
