ORANJESTAD (AAN): Ya ta algun siman caba cu informacion ta circulando cu negociacion cu sindicatonan den e compania Elmar ta pegando.
Segun un contacto den e compania, negociacion a pega cu mas di un di e sindicatonan y no cu un so.
Actualmente tin un restructuracion di posicion y salario ta tumando lugar y si e cambionan sugeri pa instancianan profesional no keda implementa, lo ta dificil pa e compania sigui existi. Lo mester bay over na privatisa e compania, manda hende di mas of cu no ta funciona cas of lo mester bolbe subi prijs di coriente pa pueblo. Segun por a bin compronde, Mediador di Gobierno den pasado a yega di bisa tur esnan concerni; si Elmar sigui manera cu e ta, e compania lo kibra.
Aparentemente tin hopi frustracion tambe den e compania, ora di storing, varios opzichters nan no tin control riba nan mesun coleganan, hopi ta bay sconde pa trabao. “Aki den pues tin tres grupo, cada un ta draai pa nan cuenta, cos no por sigui asina, cos ta putri aki den. Awor mi ta puntra mi mes, boso kier pa e compania kibra? Tin un bon team cu ta negociando e CAO nobo, nan ta consisti di trahadornan cu voluntad pa salba e compania. Asina aki nos tur por tin pan riba mesa y no pa e grupito privilegia sigui probecha y nos futuro despues ta core cab’e di gai.” Asina un fuente den e compania a duna di conoce.
Aparentemente tin miembronan di un di e sindicatonan ta purba influencia miembronan di directiva di otro sindicato pa saca informacionnan eroneo pa boycott gerencia publicamente.
Pues bon intencion pa restructura e compania ta wordo stroba. Mientrastanto no a tende nada ainda si Minister Glenbert tin intencion di interveni den e asunto. Ta parce cu mas bien e ta lagando e tarea pa e gerencia di Elmar mes keda cla cu e restructuracion pa salba e compania. Pues tin un grupito den e compania cu ta gana di mas, cu kier mas placa y lo ta stroba. Comunidad ta hopi indigna cu e informacionnan cu ta saliendo y ta pidiendo pa transparencia, pa pueblo sa kico ta pasando den companianan cu ta di comunidad di Aruba.
