Luenne Gomes-Peters, directora DIMP
*Tampoco a genera e entradanan presupuesta!
ORANJESTAD (AAN) — Directora di Departamento di Impuesto (DIMP), Luenne Gomes-Pieters, a sigui relata tocante e impuesto indirecto BTW, y con esaki a afecta algun pais, incluyendo Suriname, cu un inflacion basta halto, y cu no a genera e entradanan cu a wordo presupuesta.
El a indica cu BTW ta solamente ora e comerciante saca su factura e tin cu draag af e BTW. “Mi no a haya ni un cen di mi cliente ainda, pero na momento cu mi ta factura e cliente cu BBO riba dje, mi tin cu draag’e af”, directora di DIMP a señala.
El a agrega cu e hecho di cash flow ta bira mucho mas prominente den e discusion di un introduccion di BTW, y w ta algo cu nos mester tene cuenta cune.
“Nos ta haya cu ta importante cu e discusion mester keda, pasobra un sistema di BTW ta un sistema mucho mas saver. No tin e acumulacion cu tin den BBO, pero si nos ta mira e sistema di BBO, e acumulacion cu tin na Aruba e ta scale di 1.3. Dus, bo mester pone tur bo productonan riba un ‘plan on the page’ pa wak cual ta e sistema cu ta sirbi bo economia, bo negoshi y, e gremionan tambe mester ta cla p’e, y nos tin cu keda monitor tambe loke ta pasa den e region pa cu introduccion di BTW”, Luenne Gomes-Pieters a indica. El a agrega cu Suriname tabata cana mesun tempo cu Aruba, y nan a introduci pa 1 di Januari 2023 e BTW 10%, y tabata tin hopi protesta cu inflacion a bira hopi halto, y a pone gobierno bao presion pa hala atras e introduccion di BTW. “IMF tambe a saca un rapport, recientemente, na 2024 unda ta bisa cu e departamento di impuesto ni gremionan no tabata cla, consecuentemente, e entradanan cu a wordo pronostica pa e BTW genera, no a wordo genera. Esey ta loke nos kier evita”, Gomes-Pieters a subraya.
El a añadi cu tin mas pais cu a introduci BTW, pero tambe cu ta struggle cu e no a genera e entrada cu nan a presupuesta. “Anto, esey na final di dia, mi ta kere ta e balansa cu ta wordo busca.
- E mester ta un sistema cu ta simpel pasobra esey ta sostene cumplimento. Si un comerciante ta compronde e sistema e por cumpli mucho mas facil y mucho mas lihe.
- E mester ta un sistema cu ta garantiza entrada di impuesto, pasobra ta cu entrada di impuesto gobierno ta lora un pais.
- Mester ta sigur cu e efecto inflacionario riba e pueblo consumidor ta algo cu ta baha, pasobra bo no kier crea pobreza den e pais pa motibo di un sistema fiscal.
Luenne Gomes-Pieters, directora di DIMP a señala cu esaki ta un tema interesante. Como Fiscalista DIMP ta interesa pa sa con paisnan ta introduci esaki (btw) y con por hacie na un manera cu e cumpli cu tur tres rekisito: entrada garantiza, sistema simpel, efecto inflacionario por wordo acapara, pero na e momentonan aki Gobierno di Aruba ta prefera di warda un tempo mas.
