Algo interesante
ORANJESTAD (AAN): E aliansa di Dutch Caribbean Nature Alliance (DCNA) y Fundacion Parke Nacional Aruba (FPNA) ta orguyoso di anuncia un simposio tocante Solucionnan basa riba naturalesa (SbN) pa restauracion y conservacion di e ecosistemanan riba e islanan di Caribe Hulandes.
E evento aki, programa pa dia 10 di november di 1:30 pm pa 5:00 pm na Aruba, lo ofrece un plataforma unico pa intercambio di conocemento y experiencia den integracion di solucionnan innovado pa preserva y rehobenece e diverso ecosistemanan di Caribe Hulandes. E simposio lo conta cu asistencia di varios invitado di honor, entre nan Su Altesa Real Prinses Beatrix, Patrona di DCNA. E evento ta habri pa asistencia virtual.
Solucionnan basa riba naturalesa: E islanan di Caribe Hulandes ta conta cu ecosistemanan increiblemente bunita cu ta brinda un serie di beneficio importante. Banda di su importancia economico y recreativo, e areanan aki tambe ta di vital importancia pa mantene biodiversidad y construi espacionan saludabel y resiliente. Desafortunadamente, e entornonan unico aki ta enfrenta vulnerabilidadnan ecologico debi na menaza constante di actividad humano y cambio climatico.
Implementacion di solucion basa riba naturalesa (SbN) ta crucial pa salvaguarda e ekilibrionan delicado aki y ta garantisa cu e areanan aki ta existi pa e generacionnan venidero. E solucionnan basa riba naturalesa ta representa un enfoke innovado cu ta probecha e poder di naturalesa pa aborda desafionan ambiental urgente. Riba tereno di restauracion di e ecosistemanan, e solucionnan aki ta ofrece un rayo di speranza combinando ingenio humano cu resiliencia di mundo natural.
Simposio SbN: Pa incorpora e solucionnan riba naturalesa den e islanan di Caribe Hulandes ta importante adapta nan conservacion di naturalesa, e mundo academico, funcionarionan di gobierno y empresanan. Pa probecha tur e potencialnan di e solucionnan aki, intercambio di conocemento y e cooperacion entre e partinan interesa ta imprescindibel.
Pa e motibo aki Dutch Caribbean Nature Alliance, hunto cu Fundacion Parke Nacional Aruba (FPNA), ta organiza un simposio tocante Solucionnan basa riba naturalesa pa restauracion di e ecosistemanan na e islanan di Caribe Hulandes. E evento lo tuma luga dia 10 di november di 1:30 pm pa 5:00 pm.
"Nos ta contento cu nos por crea un espacio pa intercambio di conocemento y colaboracion", Arno Verhoeven, director di DCNA ta bisa. "E evento aki no solamente ta sirbi como plataforma pa comparti idea tocante incorporacion di solucionnan basa riba naturalesa, sino tambe ta duna aporte valioso na e proximo programa di ‘Conservation and Restauracion di Key Habitats’.
Durante e simposio, cinco ponente di gran prestigio lo presenta e tema di e solucionnan basa riba naturalesa. Tambe e directornan di multipel organizacionnan di maneho di conservacion y parkenan di Caribe Hulandes lo reuni den e escenario pa presenta y discuti nan actividadnan tocante implementacion di SbN pa restauracion y conservacion di e ecosistemanan.
E simposio ta priminti di bira un logro importante den avance di dialogo tocante solucionnan basa riba naturalesa pa restauracion y conservacion di e ecosistemanan den Caribe Hulandes. Door di fomenta e intercambio y e cooperacion di conocemento y experiencia, e kier contribui na un futuro mas berde y resiliente pa e region.
Asistencia na e Simposio: E simposio ta tuma luga na Universidad di Aruba y aproximadamente 100 invitado lo asisti personalmente. E invitadonan ta representa e partinan interesa dentro di e campo, incluyendo e poblacion local y e ONG NGO’S cu ta traha riba e tereno, funcionarionan gubernamental, studiantenan y organizacionnan local. Ademas, e evento aki lo conta cu asistencia di varios invitado di honor, entre nan Su Alteza Real Prinses Beatrix, Patrona di DCNA. Su Altesa Real Prinses Beatrix lo bishita e simposio como parti di su bishita di tres dia na Curaçao y Aruba.
DCNA ta yama bonbini na tur e personanan interesada den e tema pa join. Por fabor, sigura bo mes door di registra bo asistencia na:
E simposio tambe lo ta accesibel online pa e publico en general. E potret aki pa cortesia Christian Konig.
