Jurima Bryson, Ombudsman di Aruba:
- Base di Ombudsman ta nos ley
ORANJESTAD (AAN): Desde cu e oficina di Ombudsman a habri porta dia 1 di december 2025, ta brindando servicio di tur indole na publico. E interes den pueblo pa sa con Ombudsman ta funciona ta hopi grandi. Ombudsman ta un institucion cu por tuma keho of trata kehonan riba su propio iniciativa di tur hende, y no solamente di ciudadanonan di Aruba so.
Pero e kehonan mester ta contra e instancianan manera ley ta prescribi. E mester ta un instancia di Gobierno of un instancia (fundacionnan) cu ta ricibi fondonan di Gobierno y tambe companianan estatal (WEB Aruba NV, Setar NV, NV Elmar y Serlimar SG. Tur hende por entrega keho cerca Ombudsman contra esakinan of Ombudsman por cuminsa un investigacion riba su propio iniciativa contra e instancianan aki.
Señora Jurima Bryson, Ombudsman di Aruba, den entrevista cu DIARIO a remarca cu na momento cu entrega un keho contra un instancia di Gobierno manera ley ta prescribi, mester cumpli cu algun rekisito. Un rekisito principal ta cu mester a trata pa resolve bo keho cerca e instancia prome y duna e instancia un tempo rasonabel pa reacciona riba bo keho. Na momento cu bo no ta contento cu e reaccion aki, y no a yega na un solucion, por entrega keho na Ombudsman.
Ombudsman Bryson a indica cu e tipo di keho cu ta ricibi mas hopi ta cu pueblo ta sinti cu no ta haya contesta di e instancianan, sea ta riba un peticion of reclamo cu nan a entrega. Esaki ta e keho number un tambe cerca Ombudsman Corsou y Ombudsman Sint Maarten.
El a agrega cu segun ley ta prescribi, un caso di keho den su totalidad no por tarda mas di un aña cerca Ombudsman. E oficina ta sigui un procedura pa trata un caso dentro di 4 siman. El a enfatisa cu ta tene su mes na normanan di conducta apropia cu ta pidi di instancianan. Nan ta sigui e principio di scucha ambos banda (Hoor en wederhoor), mester comunica duidelijk, mester tene cuenta cu circumstancianan particular entre otro. Esaki ta asina tambe por ehempel cu Corte.
“Ora nos haya un keho, si nos no puntra e instancia kico e ta pensa di e keho, esey ta nifica cu nos mes no ta tene nos mes na e normanan di conducta apropia cu nos ta spera di e instancianan”, el a remarca.
Ombudsman Bryson a subraya cu tur persona cu di un of otro manera ta acerca e oficina, ta ricibi informacion. Kizas no ta e informacion cu nan a spera, pasobra e base di Ombudsman ta nos ley. Y a base di ley ta contesta y informa.
