Rish Ann Ammerlaan, Trahado Social:
*E condicionnan no ta adecua
ORANJESTAD (AAN)-- Trahado Social, Rish Ann Ammerlaan, di Fundacion Contra Violencia Relacional, den entrevista cu Matutino DIARIO a señala cu ta conoci cu FCVR, no dunando servicio di shelter na e momentonan aki.
Ammerlaan a expresa cu esaki ta un peligro pasobra nan ta na haltura cu tin hopi caso di violencia domestico severo na Aruba.
“Pero lamentablemente e estado di nos shelter no ta esun di mas adecua pa nos ofrece un miho servicio na nos clientenan.
Dus, aworaki nos mester di mas fondo pa renova nos shelter, p’asina nos por sigui brinda e servicio. Nos sa cu nos tey pa casonan di emergencia, pero tambe pa brinda nos clientenan e miho servicio y e calidad di bida”, Rish Ammerlaan a acentua.
El a indica cu e fundacion tin hopi demanda y dia pa dia e casonan ta bira mas compleho. “E necesidad di shelter ta grandi pero cerca nos awo, nos ta mira cu nos no por brinda un miho servicio, den e estado cu nos shelter ta na e momentonan aki. Mas lihe nos yega na e fondonan aki mas lihe nos por yega na e cambionan y reparacionnan cu ta necesario pa esaki”, señora Rish Ann Ammerlaand a relata.
El a comenta cu e ta haya e casonan y ta evalua nan, y den esaki e ta ripara cu tin hopi hobennan, den edad di 19 aña caba, cu ta pasa den violencia relacional. E ta pensa cu tin edadnan mas abao tambe, pero FCVR ta hayando hopi clientenan di 19 aña bay mas ariba, cu ta pasando den casonan di violencia severo y esaki ta alarmante. “Di otro banda nos ta contento cu nan ta busca e ayudo aki, p’asina nos por yuda nan”, Rich Ann Ammeerlaan a subraya.
