ORANJESTAD (AAN): E aña aki Kids & Teens Christmas Song Festival ta celebrando su di 10 y ultimo edicion di e festival di Pasco na Aruba pa mucha y hoben.
Tur aña tin 30 participante ta participa, 10 participante den cada categoria cu cancionnan di pasco na Papiamento.
Pa di 10 aña consecutivo cada participante ta wordo acompaña pa nos All Star Band di e festival bao encargo di Sr. Danny Koolman. Inscripcion a caba di habri y tin 3 categoria. E 3 categorianan ta: (*) 4 pa 7 aña. (*) 8 pa 11 aña. (*) 12 pa 17 aña.
Tur participante ta haya 4 training cu banda y ta tuma un maximo di 10 cantante pa categoria. Tur cantante ta presenta cu un banda bibo cu 15 musiconan profesional. Loke ta hasi e festival uno special, ta cu hopi cantante hoben cu ta participando y destacando den festivalnan nacional manera entre otro den Festival di un canto na nos Himno y Bandera, Festival di Dande y otro festivalnan, ta cantantenan cu a debuta pa prome biaha den Kids & Teens Christmas Song Festival.
Cada hoben su participacion ta completamente gratis y durante training e musiconan ta duna guia si e tono ta bon of si mester subi of baha un tiki y ta compaña cada participante durante nan 4 trainingnan mas un general. E rekisito pa participa ta cu e cancion mester ta di pasco of gospel na Papiamento, caminda kier stimula nos dushi idioma Papiamento.
