Directora Gomez-Pieters di DIMP
ORANJESTAD (AAN): Departamento di Impuesto na Aruba a mustra claramente, cu nan a cera aña 2024 cu ta tras di lomba, cu hopi satisfaccion pa cu e trabao cu nan a haci. Nan meta legal semper ta pa e cobranzanan di Impuesto pa garantiza caha di Gobierno. Proyectonan grandi cu segun directora Luenne Gomez-Pieters awor ta tras di lomba, ta e.o. proyecto di digitalizacion unda a digitaliza e formulario di Winstbelasting y cu a cuminza funciona na luna di Mei 2024.
Directora a splica cu e siman cu ta bin nan ta cerando luna di December. Pues analisando entradanan te cu November, por bisa cu lo logra e meta di presupuesto cu a wordo palabra cu Gobierno y aproba door di Parlamento. Por a nota cu tin un presupuesto supletorio tambe aproba net prome cu cambio di aña, y esakinan ta introduci cambionan den cobranza di impuesto cu nan a bin ta realiza caba durante lunanan di 2024.
Segun Gomez-Pieters, esaki ta temporadanan cu si e tira bista bek patras, por mira con nan tabata como organizacion, para den cobranza di impuesto cu a mehora desde como 10 aña pasa pa awor. Por corda ainda e tempo aya, ora cu pagonan di restitucion tabata atrasa, procesonan cu no tabata delinea, funcionnan cu tabata anticua te cu e Departamento tabata falta un cambio y reorganizacion interno. Asina a pone tur e reorganizacionnna grandi aki riba agenda, y aunke a wordo afecta door di Pandemia, toch despues e entradanan a bolbe crece y economia tambe a bay dilanti.
Luenne Gomez-Pieters ta wak atras cu un sentimento di satisfaccion pa cu cobranza di Impuesto, y pa 2025 e ta mira cu nan lo bay logra e meta di presupuesto di pais Aruba. Esey ta debi cu presupuesto ta hopi grandi pa cu cobranza di impuesto. Un biyon di Florin na entrada di impuesto a wordo presupuesta, y ta mira cu esaki por wordo carga pa e trabaonan cu Departamento di Impuesto a bin ta haci ultimo temponan. Aki ta referi na e cumplimento di e contribuyentenan, y e impuestonan cu ta pusha entradanan, di cual esnan mas grandi ta Loonbelasting.
E Directora di DIMP a splica cu ora nan mira entrada di Loonbelasting ta crece, esey por tin varios motibo. Pues sea tin mas hende hayando trabao, of e team di auditoría a haci control di buki na companianan y descubri cu no ta tur impuesto tabata wordo paga manera mester ta di e trahadornan.
Durante 2024 a papia varios biaha di e risico cu nan ta observa ora di controla bukinan, y tin diferente sector cu DIMP tin na bista, e.o. sector di construccion cu hopi biaha ta traha cu trahadornan indocumenta, esnan cu no ta registra na SVb, no ta registra na DIMP, etc.
“Esey ta parti di nos trabao pa nos ta semper al tanto di loke ta pasando den economia, y con e comportacion di pago y haci declaracion ta,” Luenne Gomez-Pieters a indica. “E por tin diferente motibo pakico e cifra ta mas halto compara cu e aña anterior.”
El a bisa cu entradanan di Winstbelasting ta mas halto compara cu aña prome. Esey ta duna bon bista kico ta ganashi di negoshinan na Aruba. Por conclui hunto cu e comerciantenan cu aña 2023 y 2024 no tabata mal aña, pero corda cu pandemia si a impone impacto grandi riba entradanan. Pero despues di pandemia den 2021 y 2022 por a mira aumentonan solamente den impuesto ora ta trata Winstbelasting.
