Directora di DIMP señora Luenne Gomez-Pieters:
ORANJESTAD (AAN): Directora di Departamento di Impuesto (DIMP), señora Luenne Gomez-Pieters den un entrevista cu DIARIO a duna un resumen di cifranan pa aña 2025. El a splica cu algun impuesto a conoce caida den totalidad durante e aña menciona.
Loonbelasting a conoce caida, pero segun e, esaki ya caba e departamento a spera cu lo pasa, door di e ahuste cu e ex-Minister di Finansa Xiomara Maduro a haci entrante 1 di januari 2025 den e prome tasa di inkomstenbelasting y loonbelasting cu a bay di 10% pa 0%. E departamento e tene cuenta cu e calculo aki mirando cu den su totalidad loonbelasting 2025 lo tin menos entrada door cu tasanan tambe ta baha.
No obstante esaki, señora Pieters a remarca, cu e departamento a cumpli cu e target di presupuesto. Mientras e departamento a spera menos, nan a presupuesta menos tambe.
Overdrachtbelasting tambe a conoce un caida. E impuesto aki ta mara na e cantidad di transaccion. Tabata tin un avanse grandi den transaccion. Hopi hende cu ta biba den exterior ta cumprando hopi propiedad na Aruba. Den 2025 tabatin hopi booking den e transaccionnan haciendo cu e impuesto aki ta subi. E departamento a tuma nota cu esaki a cuminsa nivela, y no tin mas transaccion compara cu e aña anterior.
