Segun Diego de Cuba, lider di STA:
ORANJESTAD (AAN)-- Den entrevista cu DIARIO, e lider sindical di Sindicato Trahadornan Arubano “STA”, Diego de Cuba, a puntra “Cuanto Ley nos tin cu a pasa den e Parlamento di Aruba, pero no ta wordo aplica, of eherce?
“Si bo no ta aplica e Ley, si bo no ta eherce, si bo no ta dune siguimento, y no tin control, cos ta bay fo’i man, y no esey so, sino tin hopi cos ta traha riba dje. Aworaki, por ehemplo, e Ley di Pensioen, e Landsverordening Algemene Pensioen, ta un ley cu ta wordo viola ‘na robes y drechi’. Pero, aworaki gobierno ta trahando riba un structura nobo caminda ta bay tin un ‘toezichthouder’ y cu kier propone pa SVb ta esun cu ta bay tin e toezicht, kiermen, e wowo y vigilancia riba e ley aki, cual ta un bon pensamento, pero bo mester prepara bo hendenan tambe. Lo mester tin suficiente hende pa tin control pasobra ta hopi compania di seguro bida tin aworaki y tin hopi djaca ta cana rond”, De Cuba a expresa.
El a agrega cu den cierto companianan STA mes ta confrontando cu problema cu no mester a tuma lugar mes. Pero, segun de Cuba, e problema no ta sinta eynan so. E problema ta sinta tambe den e companianan di seguro cu ta inverti over e placa, pero ora e asunto no ta bay bon nan ta keda keto. Ora esaki sosode mester bati na porta pero no laga e situacion crea un raiz asina fuerte cu ora bo ta bay cap e raiz eynan e ta bira fastioso.
“Ora di implementa un ley, Parlamento ta bin cu ne, ta bin cu mocion, ta bin cu e ley despues e ta bay Raad van Advies, cana un caminda di cruz pa despues wordo implementa, e Ley ta drenta y ta suppose di e wordo ehecuta. Pero kico nos ta wak? E no ta wordo ehecuta y no tin control”, Diego de Cuba a indica.
De Cuba a señala cu esaki ta e parti fastioso aki na Aruba, pasobra aworaki ta un secreto publico cu hopi hende ta traha dos of tres trabao pa nan sobrevivencia y ta logico pasobra e standard di bida aki na Aruba, dia pa dia ta bira mas caro, pasobra Aruba tin cu importa practicamente tur cos.
“Hopi hende ta lubida cu aworaki Aruba ta dependiente cien por ciento di turismo, pero nos ta wak con fragil e negoshi di turismo por bira. Durante e tempo di pandemia di Covid-19 nos a ripara cu nos no tabata prepara pa esaki”, e lider sindical a subraya.
Aworaki e ta kere ta tarea di gobierno pa traha algo manera “un dam” prepara pa e pueblo y Dios spaar nos cu si otro situacion bolbe sosode riba Aruba, no mester bolbe mendiga na Hulanda, pasobra nos ta wak ki consecuencia esey a trece pa Aruba, aparte cu nos tabata horca caba pa debenan esaki a bin riba dje, y a duna espacio pa Hulanda pa cana trapa riba nos, segun lider di Sindicato STA.
