Thomas Ruiz, Secretario di VRA:
- Cualkier “Huan Bimba por duna rijles”
- Parlamento y Minister mester zorg pa regula esaki
ORANJESTAD (AAN) Thomas Ruiz, Secretario di VRA (Vereniging Rijscholen Aruba), den entrevista cu DIARIO a indica cu Examen Rijbewijs ta basa riba un test cu Examen Rijbewijs a duna tur scol y cu tur miembro di VRA tin’e.
No por garantiza cu esnan cu no ta afilia na VRA a haye y cu nan por haya update, segun Thomas Ruiz.
“P’esey mester regul’e den ley manera nos a bise siete aña pasa, cu ta e scolnan cu ta inscribi na KvK, cu ta paga belasting y nan instructornan ta certifica, y si ta posible cu nan ta afilia na VRA, pa garantiza cu nan tin regla bao e rijschool, mescos cu e Asociacion cu tin na Curacao, y tambe e Vereniging Rijscholen na Hulanda, cu por duna rijles.
“Pero si esaki no ta wordo legisla, ta free for all tin. Cualkier ‘Huan Bimba’ bin cerca bo, bisa bo cu e por duna rijles, y abo cu bo cu no sa kico e examen ta encera, bo ta keda paga placa of bay di rijschool pa rijschool, sin ningun garantia”, Ruiz a recalca.
Ruiz a agrega cu, mas ainda, no tin un ley cu ta mara e cliente cu nan tin cu bay na un rijschool ni un rij-instructeur. “Bo por yega aworaki bay pidi bo examen, inscribi bay. P’esey e ta pone nos expone e polisnan cu ta dunando rijles na peliger. Pasobra nan ta kere cu e persona ta bin prepara pa un instructor di un rijschool. Esaki mester wordo regula y bira mas estricto. Den mi opinion persona nos tin cu stress mas riba e parti di practica y teoria, manera cu ta na Hulanda. Door di e practica bo ta haya sa si e chauffeur sa su regla, ta implementa esaki, y si por handle su auto manera mester ta”, Thomas Ruiz a vocifera.
Esaki ta Parlamento y Minister di Husticia mester percura pa esaki.
“Nos tin añanan ta pidiendo esaki caba, pero bo no duna e trafico e prioridad manera mester ta, tum’e na serio, e cos aki ta bay di “Guatemala pa Guatepeor”. Esaki ta tumando lugar na Aruba y tin efecto negativo riba e trafico, y peor ainda cu tin indicacion cu hopi fraude cu bendemento di rijbewijs ta tumando lugar na Aruba, segun Thomas Ruiz ta señala.
