Abogado Zara ta splica:
ORANJESTAD (AAN) – Abogado mr. Zara a yama un conferencia di prensa, pa elabora tocante e mucha homber Colombiano cu Warda Nos Costa a gara, y tin mas cu seis luna cera pa WNC, pasobra su papelnan no ta na ordo.
Zara a splica cu e tin un caso pa dia 8 di Februari awo, pero ya caba prome cu esaki Warda Nos Costa na un hopi mal manera, a saca e mucha homber for di Aruba.
Abogado Zara a comenta cu e hoben aki tin mas aña bibando na Aruba cu na Colombia, y el a splica algun aspecto cu, como Abogado, e mag splica.
Zara a señala cu aki na Aruba no conoce persona ilegal. Loke por tin na Aruba ta persona indocumenta, of cu su papelnan di permiso no ta na ordo, loke no kiermen cu e persona ta ilegal.
E otro aspecto ta cu un persona cu su papelnan no ta na ordo, un persona indocumenta, no por wordo cera manera un hende cu a comete un crimen.
E persona cu Abogado Zara ta defende su nomber ta Cristian Camargo Zapata, pa hopi tempo su papelnan no tabata na ordo y no por coge y cer'e sin mas, pa un tempo hopi largo.
E abogado a splica e aspecto di ley, pasobra eynan e asunto ta sinta. El a indica cu aki na Aruba, un persona cu ta indocumenta ta prohibi pa nos leynan, pero no ta prohibi den e sentido cu e ta cometiendo un hecho castigabel. El a menciona cu segun ley, LTU articulo 24 ta bisa cu un persona cu ta indocumenta na Aruba, si por haya un boet.
El a agrega cu si ta asina aki, cu na Aruba loke si ta castigabel ta si un hende ta tuma un persona indocumenta y ta pone traha y ta tine sin regla su permisonan. Eseynan si ta castigabel, pero cu boet.
El a reitera cu aki na Aruba un persona indocumenta no ta cometiendo un delito. Sinembargo, articulo 3 di LTU di Curacao eynan si, un persona indocumenta ta comete un hecho castigabel. E por haya un detencion di maximo tres luna of un boet di mil florin. Kiermen eynan tin un castigo imponi riba hende cu ta cana na Corsou ilegalmente. Aki na Aruba, nos no tin esey!
