Edward Maduro, presidente di SADA:
ORANJESTAD (AAN) – Presidente di Sindicato SADA, Edward Maduro, den un entrevista a recorda ora cu na 2020 Sindicato di Aduana a participa di Dia di Aduana, na Bonaire.
El a keda impresiona con bon e trahadornan aya ta wordo trata, kico nan autoridadnan ta, con nan ta funciona, ta un tristeza di wak con Aduana na Aruba ta wordo trata.
El a comenta cu ora cu el a drenta Aduana 22 aña pasa, Aduana tabata tin un status di un Cuerpo hopi importante ainda, pero den e ultimo cinco añanan aki cu ni dienstwagen nan tin pa haci control, contrario na Duana na Bonaire cu ta completamente ekipa cu material, toolsnan pa traha, dienstwagen pa patruya, y nan tambe tin Kustwacht aya. Pero hunto mester traha, si no, no ta logra.
“Full rond di Aruba, ta rondona di awa. Bo ta kere cu tres boto por controla full e awanan teritorial di Aruba? No por! Kizas ni cu cuater ni cu diez, pero alomenos bo ta cera e gap. Pero ora bo tin un minister cu no tin valor pa Cuerpo di Aduana, pasobra e minister aki no ta valora loke Cuerpo di Aduana ta para pe; ni motivacion nos ta haya”, Edward Maduro a expresa.
Apesar cu den pasado, prome cu Maduro a cuminza traha na Aduana, e Cuerpo tabata tin su boto, y despues nan a haya otro pa controla den e partinan mas calmo, pero Aduana merece su boto maritimo, pasobra mas hende hinca den e parti di control, mas nan ta yuda y ta alivia un poco e trabao di polis na costa, pa nan enfoca mas riba e pais mes, y ta laga esnan cu por haci trabao na Costa, hacie.
“Pero atrobe, si bo tin un minister y un gobierno cu no tin ningun tipo di valor pa Cuerpo di Aduana, esakinan bo ta haya: deterioro y demotivacion den Cuerpo di Aduana, pa despues gobierno ta pronk cu nan a scapa 600 mil florin”, e presidente di SADA, Edward Maduro a remarca.
