Minister President Mike Eman:
ORANJESTAD (AAN): Despues di firmamento di aumento salarial pa e maestronan di scol Minister President, mr. Mike Eman, a declara na prensa cu hunto cu Minister drs. Mervin Wyatt-Ras, nan ta reuniendo cu SVb pa por yega na stipula un suma adicional di aumento pa aov’ers na 2026.
Mehoramento di poder di compra ta central pa Gobierno AVP-Futuro, Eman ta expresa. Pesey lo continua trahando pa fortalece e poder di compra di nos grandinan. Desde April 2025 pensionadonan a haya structuralmente tur fin di luna e aumento di 250 Florin den nan repartietoeslag.
Minister-President Eman ta mustra su gratitud pa e hopi reaccion positivo cu a yega for di comunidad di nos pensionadonan. Den barionan cu Minister President Mike Eman ta bishita tur siman pensionadonan ta expresa hopi alegria pa cu e alivio cu e prome aumento di pensioen a trece pa nan. Minister President Eman ta bisa cu a base di un rapport di Economisch Bureau Amsterdam (Koopkracht Plan Aruba), cu gobierno a laga traha, tin un plan integral di gobierno pa bay mehora poder di compra mas ainda.
“Nos grandinan a duna tur nan bida pa yuda Aruba para fuerte riba pia. Nos deber como pueblo y como gobierno ta pa trata nan cu dignidad, husto y cu hopi cariño. E aumento di 2025 tabata un prome paso den recuperacion di e poder di compra cu nan a perde durante e ocho aña cu a pasa, awor ta sigui un yudansa adicional na 2026”.
Mas na caminda: Papiando aki di mas sosten pa pensionado; reduccion di den prima di AZV. Minister-President Eman a indica cu hunto cu Minister drs. Mervin Wyatt Ras ta haciendo e ejercisio cu AZV y SVB tambe pa busca manera pa rebaha e prima di 5% cu pensionado mester paga na totalidad, door cu nan no tin dunador di trabao pa contribui. Pa hopi di nan, e carga financiero aki ta hopi pisa.
Minister President Eman ta bisa cu pesey gobierno ta trahando pa yega na reduci substancialmente e prima aki pa pensionadonan te cu un ingreso anual di bao di 30.000 Florin.
“Un sociedad husto no ta midi progreso solamente na cifra economico, pero na manera cu e ta trata su grandinan. Nan merece paz, respet y stabilidad financiero,” asina Minister-President Eman a conclui.
