Segun rapportnan Aruba ta biba awe cu resultado Gobierno Mike Eman --- *Cuido medico den man di Mike Eman a subi belasting directamente --- *AVP a kita for di Pueblo e derecho personal pa un hende lucha pa su bida
ORANJESTAD (AAN) — Cualkier politico na mundo lo a bay sconde y keda scondi si nan a haci cu un pais, loke Mike Eman a haci.
Na momentonan sumamente serio pa Aruba y pa mundo henter, ta inaceptabel pa mira con Mike Eman ta trata di causa turbulencia y ta trata di sigui hunga cu sentimentonan di Pueblo, loke ta su arte manera su historia politico a demostra.
Ora ta papia di AZV, Mike y AVP mester cera nan boca pasobra ta nan ta causante di e problemanan serio cu Aruba conoce.
Na varios ocasion nos a duna prueba con AVP a kita e proyecto cu MEP tabata tin pa un aseguro medico nacional y uza AZV pa haci propaganda politico dilanti eleccion.
E ley no tabata bon prepara y sigur a faya na un pais chikito pa e hecho cu el a hinca cuido medico den un solo macuto, den cual AZV a bira e maestro y doño di salud di Pueblo, cu mester haci y deshaci loke AZV kier cu su salud, pasobra ta obligatorio pa ta parti di AZV.
Si un ciudadano, un persona naci of cu ta registra na Censo di Aruba, kier biba na Aruba, e ta obliga di uzo AZV como su seguro medico.
Contra tur ley di democracia, un persona no por uza ni su placa manera e kier ora e mester enfrenta morto pa mobito di salud na Aruba, caminda den Cuido Medico AZV ta todopoderoso.
DIARIO semper a protesta y lo sigui protesta contra e introduccion di AZV cu ta uno di e hermentnan tipico cu AVP a uza, pa haya voto.
AZV a rementa den man di Mike Eman, e destructor financiero di Aruba manera Reino mes a conclui ora Hulanda mes a exigi Mike Eman baha for di Fort Zoutman y supervision a wordo introduci.
Rapportnan oficial ta mustra con na 2013, ya Mike a logra produci un debe nacional di 71.2 porciento di e produccion domestico di e pais, cu no por a cera su presupuesto cu tabata tin un fayo di 8.5 porciento.
Pero no ta Mike su placa obviamente pero e pregunta ta surgi si kico lo a pasa cu Aruba si Mike tabata na mando na 2020 ora e pandemia a dal Aruba, cu ya a cuminsa economisa y tuma mas medida pa sigui cubri e debenan di AZV tambe cu ta peso pa belasting di e pais.
Un abuso total con un Pueblo ta wordo obliga di paga prima pa ta den AZV y haya loke AZV kier y por duna, y na mes momento mester paga mas belasting pa AZV sigui biba.
Dia Prome di December 2014, Mike Eman a entrega na Aruba e prueba con e ta soluciona problemanan di Aruba.
Mike Eman cu a bay eleccion na 2009 cu e promesa cu e ta deshaci di BBO, a subi BBO cu un porciento pa evita cu AZV lo a stop di existi pero asina mes AZV a keda un problema pa Aruba.
Awe e persona cu tin placa pa bay exterior y gasta mas placa pa e haya cuido medico cu e ta desea, por haci esaki.
E Arubiano cu no tin placa pa paga pa prima di AZV, belastingnan cu ta existi pa motibo di AZV, mester acepta loke AZV kier.
Ora analisa e realidad di Aruba, cu a cay den shock di un pandemia despues di a pasa den e shock cu yama Mike Eman, hasta ta dificil pa kere cu Aruba a sobrevivi.
Na e momento, sinembargo, ta mira kico ta responsabilidad.
Aruba a sobrevivi pasobra Gobierno Wever-Croes a logra cu na 2020 Aruba tabata tin un presupuesto favorabel cu un surplus di 46 Miyon.
Ora Covid-19 a cera porta di Aruba, e pais a wordo enfrenta cu un caida total di su produccion domestico.
Kico lo a pasa si Mike Eman tabata na mando? Kico el a entrega Aruba na 2017?
Cifranan cu a pone Hulanda hari. Cifranan cu mester a wordo cambia den un economia di incertidumbra pasobra ningun hende tabata sa kico lo bay pasa cu Citgo.
Awe Mike Eman a bolbe Parlamento despues di a keda scondi durante cuatro aña. Rapportnan no ta lubida. Berdad no ta lubida y ta rementa den su cara cada rato cu wega politico wordo hunga cu e Pueblo cu Mike a destrui!
