ORANJESTAD (AAN): Guardian Group Fatum, e compania di seguro di mas grandi den Caribe Hulandes, ta sumamente ansioso pa comparti cu e di 9 edicion di My Guardian Group Walk & Run Aruba ta un hecho.
Entretanto Guardian Group Fatum ta conoci pa su caminatanan exitoso na e diferente islanan den Caribe. My Guardian Group Walk & Run Aruba lo tuma lugar Diadomingo, 11 di juni 2023 cu e tema “Health is Wealth”.
E ‘walk & run’ ta cuminsa 06:00 AM na Guardian Group Fatum, caminda e lo termina tambe. Participantenan por scoge pa core 6 km, 10 km of cana 6 km den un ambiente Deportivo cu medidanan di seguridad. Instancianan y organizacionan manera Cuerpo Policial di Aruba, Aruba Triathlon Association, IBiSA, Cruz Cora Aruba, Motor Unit Aruba, Scouting Aruba y boluntarionan di Guardian Group lo coordina pa garantisa siguridad.
Pa e coredonan lo tin premio den diferente categoria di edad. E ganadonan “Overall” (masculino y femenino 10 km) lo gana un biahe pa Curaçao y participacion automatico na e My Guardian Group Walk & Run Curaçao riba 29 di october 2023.
Participacion na e My Guardian Group Walk & Run Aruba ta costa AWG.25 pa persona y registracion online ta obligatorio. Pago y entrega di T-shirt y number ta posibel diamars 6, diaranson 7 y diahuebs 8 di juni 2023, entre 5:00 y 9:00 PM na oficina di Guardian Group Fatum.
Tur aña Guardian Group Fatum ta haci donacion di e fondonan cu ta sali di e evento aki na diferente instancianan deportivo, caritativo, educativo, social of cultural.
Participacion na My Guardian Group Walk & Run ta pa tur hende. Esnan cu ta core y cana. No duda y registra mesora online via nan website:
“Nos ta contento di organiza nos ‘walk & run’. Un bon salud ta e rikesa real di bida. Cu un bida saludabel y movecion nos por cumpli actividadnan diario di forma eficiente y eficaz. E ta duna nos energia y ta contribui na concentracion y motivacion pa logra nos metanan. Ademas, un bon salud tin influencia positivo riba nos salud mental. E ta reduci stress y yuda nos biba feliz, cu na su turno ta hisa calidad di bida. Pa e motibo aki My Guardian Walk & Run ta un evento grandi y importante pa Guardian Group Fatum”. Esaki di acuerdo cu e director di e compania di seguro, sr. Diego Frankel.
