ORANJESTAD (AAN): Despues di e “Downtown Food & Art Festival”, cu a tuma luga na November 2022, diferente artista a bini hunto y forma un comision pa sigui organiza eventonan artistico den Centro di Ciudad.
E comision aki actualmente ta consisti di Mariangelica Gil Oviedo, cantante, y Ivan Diaz percusionista di e banda “Acustica”, Erika Moran, pintor artistico, publicidad den forma di boceto, audio-visual y botanica. Pues, un mescla di diferente expresion artistico combina cu musica, pintura, tecnologia, y food & beverage, cu tambe ta un arte.
E anochi aki ta hiba e tema di “Symphonic Canvas” inspira pa e manera cu e lo worde presenta, caminda e pintor lo crea un pintura hunto cu entretenimento en bibo.
E proposito di e evento ta pa promove expresion di arte den diferente forma, esta den e caso aki lo trata di musica, pintura, arte audio-visual, mixologia y mas!
E evento aki, como parti di varios mas den futuro, lo sirbi como un oportunidad maraviyoso pa e persona cu ta aprecia arte of lo desea di experiencia, pero tambe pa revitalisa e parti importante aki di nos centro di ciudad.
Tambe nos ta invita otro artistanan cu lo desea di uni den e experiencia aki pa explora combinacionnan di arte y comparti esaki cu nos comunidad.
Nos invitacion na comunidad ta pa bini y participa, aunke ta importante pa sa cu tin 50 espacio so disponibel. E evento ta den e “Galeria di Arte” na Harbour House den Weststraat.
