E rikesa di pasado ta e herencia mas grandi di un nacion
*Un tanki cu ta colecta awa pa e no bay perdi den laman
*Un relato di experencia di ayera por ta base pa sobrevivi awe
ORANJESTAD (AAN) — Uno di e problemanan serio cu den historia di Aruba, educacion na school a confronta, tabata sigur den e tempo cu ainda les na school tabata basa riba material Hulandes.
Den e tempo cu no ta sin mas ta subi avion bay Hulanda y otro pais, muchanan mester a comprende cu “Mies no por a pasa e sloot”.
Kico ta un sloot, tabata poco dificil pa splica un mucha cu mester a hiba por ehempel lagoen, pa e comprende e concepto.
Mas dificil tabata cu e awa den tanki por a bira ijs.
Awe ta poco dificil pa un mama bay den mondi y colecta material pa traha “glas”pa bebe awa.
Un museo ta colecta loke tabata tin den historia, sigur un historia rico manera Aruba, cu awe a pesar di tur problema financiero, ta keda un pais cu a conoce desaroyo y asina cambionan grandi cu a imprimi nan mes den historia di e pais.
Nan ta recorda nos cu ayera bida tabata un lucha duro pero na mes momento ta entrega nos inspiracion kico por haci si coriente bay; si no tin placa pa mucha cumpra juguete y mester traha juguete na cas y mucho mas.
Den museo nos ta haya e coleccion di peliger cu a yega di bira amenasa pa e poblacion.
Nos ta topa cu pinturanan y cu otro expresionnan di arte, cu ta duna nos un imagen di realidadnan di ayera cu nos mester pa por sigui traha riba futuro.
Problemanan cu a ataca nos ayera, por sorprende nos awe.
Na entrada di Siglo 21, mundo por a pensa cu e lo a topa cu un pandemia cu a paralisa tur pais y a cambia bida den un rato?
Den un museo nos ta topa cu e realidad di antes riba tur tereno, dependiente di e loke e museo ta acentua.
Pero un museo ta entrega na historia, e relato di ayera cu hende mester pa reconoce su mes.
Nos ta tende di instrumentonan cu tabata tin ayera. Kico e tabata encera?
Con e Florin tabata ayera, di cual fecha e ta data y ta berdad cu un Florin por a cumpra hopi den pasado?
Con economia di Aruba a crece y con comunicacion entre hende a crece?
Den nos mundo moderno nos ta tuma hopi logro como garantia. Pero ta sin mas tur cos a kita cay for di cielo?
Kico mas tin den hende ademas di e conocemento con produci placa? Kico ta biba den un hende?
Expresionnan di arte ta papia den presentacion di decadanan, cu hende mes a inventa pa clasifica historia den temporadanan.
E cuchara di plastic di awe lo ta den museo den futuro pa hunto cu e coleccionnan di plata y oro splica un generacion nobo con hende a cambia clima?
Museu ta exposicion di e relato di bida humano; di historia di un pais; di fe di un pais; di tradicionnan di un pais; di cultura di un pais; di alma di un pais.
Aruba mes ta un museo como destinacion turistico.
Cuanto yiunan di Mericano cu a proteha Aruba tempo di Guera, a bishita Aruba como turista pa nan mira e beach cu nan tata, welo of omo a proteha contra bom di Hitler?
Museonan na Aruba ta duna nan oportunidad pa mira, cada uno riba nan tereno, con Aruba a biba, a produci, a sobrevivi como parti di mundo y con hende por haya inspiracion den pasado pa awe atende cu cambio di clima, cu bunitesa di hende pinta na mil manera.
Un analisis di museo ta conduci finalmente na un pregunta importante. Un museo ta algo di ayera of tin un balor den tempo moderno?
Historia di progreso ta hari. Pasobra pa awe hende disfruta di progreso e mester conoce su historia y su balor. E mester di su identidad, cu ta reuni den loke nos ta yama museo, cu ta presenta pueblo su base den un mundo cu ta exigi hende bolbe poz pa evita abuso di awa den un tempo di cambio di clima cu por trece secura of horcan cu ta exigi cas cu por soporta biento fuerte.
Museo, e centronan cu ta hiba ayera y awe pa futuro, caminda nos mester bolbe realisa e bunita di e beachnan di Aruba, caminda e santo blanco ta purufica awa di laman y ta recorda nos cu nos mester lucha pa e Aruba cu su cucharitanan di oro; su artistanan den tur ramo; su obranan y su trabou pa avionnan baha na aeropuerto y bishitantenan bin disfruta di Aruba Dushi Tera.
