ORANJESTAD (AAN): Manera ta custumber Museo Arqueologico National Aruba (MANA) lo ta habri pa publico diamars dia 25 di januari 2022 di 10’ or di mainta te 2’or di merdia.
E aña aki MANA ta presenta, banda di su exposicion permanente, e exposicion di arte contemporaneo “Fissures” (Rupturanan) di e artista local Belinda de Veer.
Den e salanan di exposicion di MANA tambe por pasa admira e instalacion di obra di arte impresionante di e artista Velvet Zoe Ramos, ‘Untitled’ di e serie ‘Navegantenan“ y e exposicion fascinante “Di Tera nos ta bin y di Tera nos ta bai” di ceramista Trudy Lampe.
Riba e dia aki tambe lo tin den auditorio di MANA un presentacion di un poster di arkeologo Harold Kelly, kende ta haci su investigacion di doctorado (PhD), riba adaptacionnan na cambio di clima. Ta pidi cooperacion di bishitantenan pa participa na e encuesta. Harold Kelly lo ta presente pa comparti informacion di su investigacion y di e encuesta.
Mas cu claro tur bishitante mester drenta cu tapaboca bisti, ta registra y usa handsanitiser. Mester mantene distancia fisico y sigui instruccion di personal di MANA. Pa evita aglomeracion y mantene e fluho di bishitantenan ordena y sigur lo tene e cantidad di bishitante pa cada espacio na un maximo.
Museo Arqueologico Nacional Aruba ta desea comunidad di Aruba un felis y sano Dia di Betico 2022.
{gallery}Museo Arqueologico Nacional Dia di Betico{/gallery}
