ORANJESTAD (AAN) – Marguerita Wever, Hefe di Educacion y Presentacion di Museo Arkeologico, a indica cu Museo Arkeologico a forma parti di e Dia Monumental 2024,
unda den fin di siman, a tuma lugar un Open Monumentendag, cu manera por mira riba potret, tabata basta bon bishita.
Manera ta conoci, diferente monumento na Playa a habri nan porta, no solamente edificionan cu arkitectura impresionante, pero tabata tin varios actividad tambe, incluyendo Museo Arkeologico, unda cu Arkitecto Dada Picus, reconoci pa su estilo di arkitectura, a duna un charla, como tambe Arkitecto Raymundo Dijkhoff, cu a brinda dos presentacion di un lectura, uno pa 11 or di mainta y otro pa 1 or di atardi.
E lectura a bay tocante e monumentonan mas bieu di Aruba cual ta e sitionan arkeologico. Cushina y skina di actividad pa e muchanan tabata na encargo di e grupo cu ta recauda fondo hunto, manera un famia, y tabata tin actividadnan diverso.
A tuma lugar un festival di sopi, un dushi juice di lamunchi y pop corn pa e muchanan, y tur bishitante a haya un stempel di Indian gratis, entre nan e scolnan cu a haya un passport door di Stichting Fondo di Monumento pa bishita tur museo.
