Resultado conoci den dos aña ta 275 Miyon caso y 5.35 Miyon morto -- *Sector financiero mundial na careda aunke Biden ta nenga lockdown -- *Turismo crucero a conoce su promer test den e menasa di Omicron
ORANJESTAD (AAN) — Kico ta e medidanan cu Merca lo tuma enfrente e ola pisa cu expertonan ta spera pa e pais, cu ya ta mira un crecemento enorme den e cantidad di casonan?
Esaki ta uno di e preguntanan cu mester a ricibi contesta ayera mientras DIARIO tabata prepara edicion di awe.
Te cu ayera den horanan di anochi e contesta di Presidente Joe Biden tabata cu e lo no lockdown.
Cu tres variante e Coronavirus nobo ta sigui ataca mundo, cu a cuminsa registra su peliger exactamente dos aña pasa.
For di e prome momento cu e malesa a anuncia su presencia na mundo na final di 2019, un total di 275 Miyon caso y 5.35 Miyon morto a wordo registra mundialmente.
Su origen definitivo no ta conoci ainda y su final ta solamente un calculacion di mundo cu a pensa cu na entrada di 2022 mundo lo tabata recuperando di e malesa, cu awe tin mundo completamente for di control.
Como parti di mundo, Aruba tambe ta registra uno di e cambionan di aña cu mas confusion mundial den historia.
2022 ta bati na porta cu presencia di tres variante di Covid-19 presente pa wordo atende dor di profesionalnan den Cuido Medico riba tereno internacional, cu ainda no por splica mundo kico e ultimo variante ta significa pa hende.
E variante original a produci e version Delta y awor Omicron a uni na e trio, cu ta destrui e planificacion mundial pa 2022, manera DIARIO a adverti.
E instabilidad mundial a manifesta su mes den sectornan cu relacion directo cu placa, cu mundo mester na cantidad pa por confronta Covid-19.
Ayera e sector financiero a conoce caida den e centronan mundial di negoshi grandi caminda e balor di negoshinan grandi a baha.
E resultado negativo pa inversionistanan a uni na decisionnan pa stop eventonan mundial importante cu mester a produci entrada den e temporada importante di cambio di aña, ora cerca rico y pobernan placa ta lora.
E miho temporada pa haci negoshi a wordo destrui dor di Covid-19 cu resultadonan pisa, cu ainda mester bati na porta di Aruba.
E prome menasa grandi directo pa turismo tabata e cantidad di turista cu Covid-19 a bordo di un crucero. E suceso aki a haci cu alarma a wordo bati den e sector di crucero cu introduci medidanan special pa por a reanuda biahenan cu mester a stop pa motibo di e malesa.
Negoshinan den ramonan mara na turismo, na Merca e siman aki ainda tabata traha a base di e tendencia di publico Mericano pa continua cu nan plannan pa pasa vacacion den exterior.
E realidad na entre otro cantidad di pais na Europa, a haci cu advertencianan a cuminsa na publico pa tene cuenta cu e hecho cu varios pais a cuminsa cera nan porta pa biahero of impone medidanan pa nan entrada.
E cantidad di casonan na varios parti di Merca a bira explosivo y medidanan cu segun espectativa por wordo anuncia awe, por afecta e speransa di cantidad di pais cu ta depende di turismo Mericano.
Destinacionnan turistico na varios pais di mundo cu no a conoce un ola pisa di Omicron, ta trata di mantene nan nivel di turismo.
E siman aki lo ta uno crucial pa tur sector mundialmente.
Na Europa (tambe Hulanda) ya ta prepara hospitalnan pa un posibel aumento importante den hospitalisacion.
Ainda no tin un bista cla riba e loke por spera y no por bisa cu certeza cu Omicron lo no ataca cu mes seriedad cu e variante original y despues Delta.
E siguransa mas grandi cu mundo tin actualmente ta, cu e variante Omicron ta sumamente contagioso loke ta duna paisnan menos tempo pa contesta su atake. Esaki ta nifica cu Gobiernonan mester ta prepara pa actua y tuma medidanan pisa na momento cu e bati na porta.
