Conferencia di Clima ta topa cu reunion di OPEC na momento clave
*Cumbre di Clima na Dubai pa por confronta amenaza di naturaleza
*Temperatura tropical na paisnan friu, inundacion y angustia humano
ORANJESTAD(AAN)—Na e momento cu hende tabata lucha contra e pandemia di Covid-19, mundo tabata prepara pa atende cu otro amenaza grandi cu e matanza di e coronavirus nobo, no a permiti pa wordo discuti na 2020.
Na 2021, paisnan a bini hunto na Glasgow caminda un serie di medida urgente a wordo tuma pa hende por atende cu e problema mas serio cu e kier a ignora.
Na 2021 un serie di medida a mira luz pa evita loke na 2023 a bira realidad manera informacionnan internacional ta indica den un alarma cu no por wordo tolera.
E siman aki, manera ya DIARIO algun dia pasa a anuncia, e dos interesnan grandi di mundo ta topa otro, cu ta e interes di bienestar di hende y naturaleza enfrente e interes economico, cu ta produci placa pa por inverti hasta den sobrevivencia.
Pa un parti grandi, hende a ignora e realidad di e peligro grandi di clima, cu na 2023 a duna mundo prueba cu e ta existi.
Temporada di horcan 2023 den e region Caribense, sigur na Aruba a entrega e prueba, cu clima a cambia y reglanan cu hende a crea pa naturaleza, a stop di existi.
Na paisnan friu, calor intenso a manifesta su mes y inundacionnan a destrui tera fertil pero tambe bida di hende cu no a logra scapa.
Na Dubai na 2023 mundo ta bolbe reuni pa bolbe papia di medidanan cu mester wordo tuma of mihor bisa, ehecuta, ya cu na 2021 hende a logra e acuerdonan pa confronta e enemigo grandi di hende, cu ta cambio di clima.
Mientras paisnan ta reuni pa atende cu clima, OPEC, e organisacion di paisnan productor di petroleo, tambe ta bini hunto.
OPEC ta indica den publicidad riba e forma cu intentonan ta wordo haci pa energia bira mas limpi.
Den e proximo dianan lo bay ricibi mas informacion riba tereno di produccion di petroleo, central den e desaroyonan di medio ambiente.
Cambio di clima y petroleo ta topa otro na final di 2023, cu no a logra recuperacion mundial total di 2022, cu a bira e aña cu inflacion, cu a manda tur prijs halto y a percura pa te awe, e nivel di bida di hende, no a bolbe na loke a wordo proyecta despues cu hende a logra vence Covid-19.
Acopla na e guera na Ukraine y awor e Guera na Medio Oriente, entrada financiero cu ta dicidi tambe pa calidad di bida di hende, a percura pa un 2023 sumamente dificil y un falta di vision positivo pa futuro, manera expertonan mundial ta mustra.
Mundo e siman aki ta regresa na 2021, ora a logra e Acuerdo di Clima pa hende por confronta e cambio di clima.
Un acuerdo cu a exigi maneho aserta cu na Aruba a wordo implementa pa un gran parti pero hopi pais no a logra.
Un siman sumamente importante pa mundo ta desaroya y DIARIO lo tene su lectornan informa na final di 2023, cu ta duna tur dia mas indicacion cu 2024 lo trece cambionan grandi y lo exigi adaptacion di reglanan basico cu hende ta considera awor normal pero a afecta e mundo cu hende tin como cas!
