Crisis a bira e palabra mas uza durante prome 25 aña di Siglo 21
*Lucha politico y cu naturaleza na Merca productor economico di Aruba
*Calidad di liderazgo di Aruba ta elemento principal pa futuro di pais
ORANJESTAD(AAN)—Ta costumber di DIARIO cu na fin di aña, ta cuminsa splica comunidad di Aruba, kico por spera di e aña nobo na caminda a base di investigacion y analisis intensivo.
Aruba na e momentonan aki, ta cuminsa experencia uno di e problemanan mas serio pa cual DIARIO a adverti, cu ta e cambio di clima cu calor insoportabel pa Aruba pero tambe catastrofe na hopi pais.
Uno di e paisnan cu mas ta sufri na e momentonan aki di loke clima por produci, ta hustamente Merca, cu ta victima di e furia di naturaleza cu laga desaster atras na varios estado Americano y ta bolbe amenaza otro parti di Merca.
Den e pasashi di horcan na Merca, ayera ya e cantidad di victimanan mortal di Helene, a surpasa 200 y a sigui subi mientras no por calcula cuanto victima mas lo wordo agrega na e lista.
Na mes momento otro partinan di Merca ta prepara pa otro horcan Milton cu ta move den direccion pariba pa bay alcansa Florida, mientras ayera cinco sistema tabata move riba Oceano Atlantico.
Daño di horcan ta wordo causa pues na Merca, e pais cu ta productor economico di Aruba no solamente pa turismo pero tambe riba otro terenonan y sigur como productor di cantidad di producto cu ta wordo importa na Aruba den e trafico comercial cu Merca.
Instabilidad y problema na Merca sigur tin su resultado na Aruba, cu ta sigui tambe e proceso electoral na Merca, cu na 2024 ta mira un confrontcacion den cual ta dificil pa menciona un ganador na e momentonan aki.
Loke si mester tene na bista ta, cu den e procesonan aki lidernan nobo ta nace y ta presenta e figura di politiconan Americano di futuro. Den esaki sigur e candidato Republicano pa Vice Presidente, JD Vance, ta duna prueba di e forza cu e por tin den e lucha electoral na e pais.
Uno di e problemanan grandi na Merca ta keda e situacion di personanan indocumenta cu ta busca residencia na Merca, cu sin duda pa un parti grandi ta bay lucha pa recobra su forza internacional.
Aruba mientrastanto na final di 2024 mester tene na consideracion e forma cu problemanan social na diferente pais den region di Caribe y Latino America, ta produci refugiadonan social cu ta mira na Aruba un paraiso.
Reino Hulandes sigur lo duna sosten riba e tereno pa preveni entrada ilegal na Aruba, teniendo cuenta cu e maneho directo di e actual Gobierno Hulandes, cu ta tuma medida serio contra migracion mientras manera DIARIO semper a splica, Hulanda mes ta den problemanan sumamente serio.
Stabilidad di e Gobierno Hulandes ta keda e pregunta grandi despues di un formacion basta dificil.
Na caminda pa 2025, DIARIO lo bay amplia riba tur tereno manera ya ta costumber den un tempo di cambio rapido no solamente di naturaleza pero di tecnologia, di sistemanan industrial moderno y formanan di bida y comunidad cu continuamente lo exigi adaptacion.
Manera ya bisa Aruba ta uno di e poco paisnan, cu a logra recupera di problemanan grandi durante e prome 25 aña di Siglo 25.
Reconocemento grandi sigur mester wordo duna na Prome Ministro Evelyn Wever-Croes y su team, si tuma na consideracion cu na 2014 Aruba tabata realmente un empresa bancarota cu Reino mester a scapa cu medida contra e gobernacion di e tempo.
Na 2017 e situacion a bira mas agudo, manera e cifranan di presupuesto a indica pero a keda scondi pa Pueblo te ora a bini cambio den gobernacion na Aruba.
Na 2017 Aruba a conoce su momento di horor ya cu instancianan oficial di Aruba no por a duna un analisis di loke Aruba por a spera na 2018 debi na e hecho cu Aruba tabata rehen di Citgo.
Eleccion 2017 a trece e cambio ora entrada di Gobierno Evelyn Wever-Croes a percura pa e cambio financiero grandi di Aruba, cu Gobierno Wever-Croes a hereda completamente kibra.
Ta e recuperacion cu el a asegura a haci cu na final di 2024, Aruba ta den un situacion cu tur loke maneho por asegura, ta honra e necesidad actual cu problemanan politico y cambio di clima, ta exigi.
E prome 25 añanan di Siglo 21, awe ta entrega un circulo. Na 2007 desaroyo internacional a conduci na e introduccion di BBO pa confronta e recesion mundial.
El a wordo sigui pa accion politico pa haya voto di Mike Eman cu a destrui situacion financiero di Aruba cu decision di kita BBO y creacion di e fantasia di Citgo, cu a crea speranza economico falso.
Na 2017, un era nobo ta cuminsa cu maneho di Gobierno Evelyn Wever-Croes, cu hasta despues di un Pandemia, awe ta entrega Aruba un situacion solido na e momento historico di turbulencia politico mundial y amenaza di clima!
