E creacion di dos campo opositor den porta di Aruba ta intensifica --- *Sin petroleo Putin ta perde su arma mas valioso den conkista mundial --- *Acuerdo mundial pa clima ta pio cu bom nuclear pa Vladimir Putin
ORANJESTAD (AAN) — Un situacion sumamente tenso ta desaroya su mes mundialmente.
Paisnan den region Caribense y Latino Americano ta wordo directamente vigila mientras por nota cu dos campo opositor ta wordo forma den e region na cual Aruba tambe ta pertenece.
Ya tin tur indicacion cu cuba, Venezuela y Nicaragua lo no wordo invita pa e Cumpra di Estadonan Mericano dor di Merca.
DIARIO ta vigila e situacion regional den situacion mundial cu ta escala.
“E poder di Rusia no ta Comunismo. Cuba y tanto otro pais cu a cay pa Comunismo no solamente ta depende di Rusia pa poder militar. Rusia ta un poder petrolero. E crisis Irak/Iran na 1980 a comberti Union Sovietico den e poder petrolero mas grandi di mundo.”
E berdad mester wordo mustra na mundo, cu ta wordo directamente afecta y directamente destrui riba tereno social, economico y financiero.
Manera DIARIO a relata siman pasa e hecho cu mundo liber kier deshaci di compra di productonan petrolero di Rusia como castigo pa e forma cu el a invadi Ukraine, tin resultado directo pa negoshi internacional di petroleo.
Rusia ta uno di e paisnan productor mas grandi di petroleo na mundo y na 1980 pa motibo di e guera entre Irak y Iran a bira e productor mundial mas grandi di azeta.
Informantenan ta splica cu mester aclarea e papel y e poder di petroleo den e forma cu Rusia a conkista mundo.
Ehempel a wordo duna di e forma cu Cuba ta depende di Rusia cu tambe ta uza su poder comercial di petroleo pa plama su poder comunista, cu ta simplemente un forma dictatorial cu ta pone tur poder den man di un solo persona y grupo.
Sin negoshi di petroleo Rusia ta perde su atraccion pa e paisnan cu el a conkista y ta depende di su fabornan pa tin gas y combustibel.\
Informantenan a indica cu na 2021 mundo a tuma uno di e decisionnan mas pisa pa paisnan productor di petroleo ora e firma e Acuerdo pa Clima, cu ta exigi pa deshaci di petroleo y gas pa proteha clima.
E reaccion di paisnan di OPEC a haya tur atencion. Mundo no a para keto kico e Acuerdo di Clima lo haci cu economia di Rusia cu manera DIARIO a splica for di principio di e guera, tabata e fuente di combustibel pa Europa y pa Merca mes.
Ayera e menasa di mundo cu ta kibra acuerdonan pa entrega di petroleo Ruso, a haya contesta directo di Putin cu a acusa Merca di a habri porta pa Rusia wordo ataca dor di Ukraine.
Na mes momento Merca y paisnan liber di Nacionnan Uni a acusa Putin di lansa atake riba e capital di Ukraine na momento cu e representante di Nacionnan Uni tabata na Ukraine.
Informantenan ta papia di un situacion mundial sumamente tenso pasobra mundo kier mishi cu e poder mas grandi di Rusia, cu ta petroleo.
Si paisnan liber stop nan negoshi den petroleo cu Rusia, esaki lo nifica final di economia di Rusia y un desaster mundial debi na e poder cu petroleo Ruso tin na podernan Comunista.
Na e momentonan aki mundo ta registra su tercer Crisis di Azeta for di 1973 ora e asina yama Guera di Yom Kippur a bira realidad como Prome Crisis Mundial di Petroleo.
E segundo crisis mundial di petroleo tabata na 1980 cu e Guera entre Irak y Iran, y a conduci na e salida di Lago na Aruba y a destrui economia di Aruba.
Ta e Guera entre Irak y Iran, a haci cu Rusia a bira bira e pais productor mas grandi di azeta na mundo.
Ta cu azeta como miho instrumento, Comunismo a plama su mes como forsa economico cu awe e ta defende den e tercer crisis di petroleo. Esaki lo nifica cu atrobe poder mundial militar lo uni cu poder economico di azeta.
Ayera e tension internacional a haci cu prijs di petroleo a bolbe subi den un mundo na careda pa petroleo na momento cu ya mundo mester a cuminsa baha su uzo di azeta y gas den cuadro di e Acuerdo di Clima, cu lo ta desastroso pa e economia di Rusia!
