Caida di muraya di Berlin a pone mundo lubida Stalin? --- *Petroleo ta e poder di Putin pa destrui economia mundial
ORANJESTAD(AAN)—Prijs di petroleo ta subi y baha. Mundo ta enfrenta un recesion mientras costo di bida ta bira insoportabel.
Ayera tur pais na mundo a presta atencion na e informacion cu DIARIO ya a presenta y cu tabata mustra con inflacion ta crea hamber y miseria rond mundo.
Uno di e sancionnan cu mundo por introduci pa pone un fin na e abuso di Vladimir Putin ta, pa corta e benta di petroleo di Rusia, cu ta ocupa e segundo puesto mas halto den paisnan productor di petroleo.
Sinembargo, mundo no por actua contra Rusia sin mas, pasobra mundo a pone su mes den man di Rusia riba tereno di economia mundial.
Na 1989 mundi a canta victoria ora a muraya di Berlin a basha abou. Union Sovietico a stop di existi y aparentemente Stalin y Stalinismo lo a pasa pa historia di crueldad na mundo.
Sinembargo, mundo a lubida historia y mundo comercial internacional a brasa e posibilidad pa haci negoshi cu Rusia si mira kico esaki lo encera.
Na momento cu problemanan a cuminsa na Ukraine, DIARIO a mustra riba e problema serio cu esaki lo nifica pa mundo debi na e situacion economico cu ta papia di relacionnan comercial importante entre Rusia y mundo liber.
Realidad ayera tabata espantoso.
Hende inocente tabata wordo mata na cantidad. Hende cu Putin mester mata pa asina e haya poder.
Mercado di petroleo tabata subi y baha mientras Putin tabata busca aliadonan den mundo di petroleo cu e tin den tension.
Economia di henter mundo a wordo kibra dor di un homber cu a duna continuacion na Stalinismo, na destruccion comunista di e ser humano cu no tin ningun balor den e sistema comunismo den cual solamente placa y mas placa pa dirigentenan comunista ta importante.
Cada rato mas imagen espantoso ta wordo presenta na mundo, cu ta pasa den problema serio pa motibo di e realidad cu negoshi di petroleo cu Putin no ta continua.
Awe e berdad di mundo ta dal den cara di mundo, cu a entrega su economia na comunismo, cu ta paga cu destruccion di e ser humano y economia mundial.
Na Merca awe kier sigui cu e ductonan di petroleo den e proyecto cu Biden a prohibi di continua y cu a cuminsa tempo di Trump pa produccion di petroleo.
Na tur pais pasonan nobo ta wordo tuma pa yega na energia alternativo di hidrogeno.
Mundo a pone su mes den man di Rusia, cu a demostra cu comunismo no conoce cambio.
Awe recuerdonan di caida di e muraya di Berlin ta bini dilanti pa corda mundo con na 1989 mundo a pensa cu el a pone fin na Stalinismo.
Pero mundo mester a dicidi brasa comunismo cu awe den figura di Vladimir Putin a duna prueba cu Stalinismo no a muri.
Awe crueldad ta rey na Ukraine, cu a bira victima di e poder comercial cu mundo liber a entrega Putin, cu ta destrui e ser humano cu arma pero tambe cu destruccion di economia mundial.
