ORANJESTAD (AAN): Central di Polis a dicidi Dialuna anochi laat pa manda diferente patruya di Polis cu urgencia na e Compleho di Casnan di Pueblo na Sero Patrishi.
Diferente yamada tabata drenta cu tin un pelea grandi andando, y cu esaki ta escalando.
Mesora un total di 4 unidad di Polis di Playa a yega eynan, y asina cuminza trece trankilidad bek den e area. Nan a bin nota cu debi na e pelea, un auto eybanda a sufri daño.
Testigonan a splica, cu un persona bao influencia di un of otro substancia, a pasa den e caya y a bisa algo. Aki ta unda e otro partido a manda algo y kibra glas di e auto, y despues escala y bay riba e persona den auto, y a dune un bati y maltrat’e tambe.
Riba caminda por a mira basta glas benta, posiblemente di e auto cu a sufri daño. Polis a logra trece trankilidad bek pa anochi por a sigui trankil.
