LIMA: Un gang criminal di rebendedor cu ta wordo yama ‘Los QR de la estafa’ a logra gaña mas di 7 mil hende door di bende nan ticket falso pa e concierto di Daddy Yankee na Peru.
Segun calculo haci pa Polis, e gang tin un hoben di apenas 18 aña como cabezante, kende a bin cu full e idea pa gaña nan victimanan, y asina genera den djis algun dia un total di 2.5 miyon Soles (como 650 mil Dollar).
Coronel Manuel Cruz kende ta Hefe di Division di Estafas di autoridad local, e lidernan di e gang aki a logra huy. Pamela Cabanillas Soley di 18 aña a huy Dialuna cu un vuelo pa Spaña cu e placa cu el a compila di bendemento ilegal di tickets pa e concierto.
Polis sa cu e muher hoben aki tin antecedente di a comete estafa caba pa otro conciertonan.
E dos complice di Pamela, esta Franco Patiño Guerrero di 21 aña y Adriana Lucia Urresti Sanchez Moreno di 18 aña a huy pa Colombia siman pasa 14 di October.
Polis na Peru a logra detene un di e rebendedornan kende sinembargo no ta den e top di e gang di estafa aki.
E forma cu nan tabata estafa hende, ta pa usa ticketnan di berdad pa e concierto di Daddy Yankee, pa despues genera ticketnan falso. Nan tabata usa personahenan conoci riba Social Media y tambe Influencers, pa asina nan haci propaganda pa bendemento di e ticketnan falso, y tabata duna un tipo di confianza cerca e potencial victimanan.
“Nan tin ticket cu ta autentico, pero ta usa e informacion tanto di e QR-Code como e Barcode via di Influencers y TikTokers pa asina por genera seguridad cu nan ta aproba bendemento di e ticketnan aki via di Social Media.”
E vocero di Polis a bisa cu e estafadornan a usa e mesun ticket pa ofrece diferente victima sin cu nan a ripara cu nan ta hayando ticket falso.
Un solo ticket a wordo rebendi 75 biaha. E computer na porta di concierto lo acepta solamente e prome cu drenta. E otronan lo no por drenta mas. Pesey mes, e victima ta cumpra e ticket y e no sa mes cu ora e yega e porta e lo no por drenta y mira e concierto.
Polis na Lima a haya un total di 104 denuncia, y nan a crea un database di e victimanan pa e caso aki cu a bira uno grandi. Polis ta manda mensahe cla y raspa na tur hende, pa evita di cumpra ticket pa cualkier concierto of evento si e no ta bin di fuentenan no-autoriza.
A sali na cla, cu e gang aki tabata hasta usa rebendedor cu ta haya un comision chikito pa cada ticket cu nan bende. Tin cu a bende 10 ticket na prijs di 680 soles. Otro persona a bende te cu 100 ticket, y tur e placa nan mester a deposita riba un account di banco.
