Misha Raymond di Respaldo:
ORANJESTAD (AAN): E preocupacion pa e bienestar emocional di mucha y hoben ta crece, mientras señalnan di angustia ta manifesta na un edad cada biaha mas abou. Segun Misha Raymond, GZ Psicologo di Mucha y Hoben na Respaldo, tin muchanan di apenas 10 aña cu ya ta expresa cu nan no kier biba mas, pasobra nan ta sinti cu bida ta inhusto of sin sentido.
Raymond a splica cu, mientras antes e mundo di muchanan tabata concentra principalmente riba wega, deporte y scol, awendia nan ta wordo exponi via medianan social na realidadnan cu ta bay leu for di nan entorno na Aruba. Hopi biaha, ni e muchanan ni nan mayornan ta suficientemente prepara pa procesa loke nan ta encontra.
Segun e psicologo, mucha y hoben ta experimenta mas angustia, insiguridad y miedo pa futuro, sin semper sinti cu nan tin e capacidad pa enfrenta situacionnan dificil. E sentimentonan aki por haci cu nan ta cera nan mes y sinti cu nan problemanan ta bira demasiado grandi pa maneha.
P’esey, Raymond a subraya e importancia di reconoce dificultadnan emocional na tempo. Mientras mas tempran identifica problemanan cu regulacion emocional y desaroyo di personalidad, mas oportunidad tin pa brinda e ayudo apropia.
El a indica tambe cu e pandemia di Covid-19 a contribui na e mesun insiguridad aki. Como un pais chikito cu recursonan limita, Aruba a enfrenta retonan cu nan impacto ainda ta wordo sinti awe. Durante e periodo ey, gaming, uzo di pantaya y medianan social a ocupa un espacio cada biaha mas grandi den bida di mucha y hobennan.
Mayornan cu ta busca ayudo psicologico pa nan yiunan, frecuentemente ta menciona cu e muchanan ta pasa hopi ora riba tablet of telefon y ta drumi laat. Ademas, e comparacion constante cu loke nan ta wak online por afecta nan autoestima y e manera cu nan ta balora nan mes.
Raymond a enfatisa cu mayornan tambe mester guia pa atende e retonan aki. Un miho comprension di e necesidadnan y sentimentonan di nan yiunan, combina cu acompañamento y orientacion riba uzo di pantaya, por contribui na un desaroyo mas sano.
Reconoce e señalnan na tempo y mantene un comunicacion habri na cas ta pasonan importante pa brinda mucha y hoben e apoyo cu nan mester.
