Plan di Mayor Aruba:
ORANJESTAD (AAN): Vakantie Grandi ta na porta y hopi mayornan separa ta haya nan mes confronta cu un reto adicional: con bo ta traha un plan di criansa comparti cu ta husto pa tur hende y mas importante husto pa e yiu?
Segun Plan di Mayor Aruba, e temporada di vacantie grandi no mester ta un tema di discusion, pero un oportunidad pa mayornan brinda nan yiunan memorianan agradabel den ambos hogar.
Con por organisa e plan di criansa pa Vakantie Grandi:
(*) Papia ariba e tempo comparti, na tempo: No warda te na e ultimo momento pa haci palabracionan ariba temanan manera, biahe, actividadnan, unda muchanan lo keda, vakantie camps nan etc. Un criansa comparti funda ariba respet, ta rekeri comunicacion habri y claro cu un planificacion di antemano pa mitiga e expectativa pa e temporada aki.
(*) Acuerdonan Skirbi: Mayornan cu a traha nan plan di criansa comparti na Plan di Mayor, sa cu un di e formanan pa evita conflicto ta, pa tin e acuerdonan concretiza. Cu guia di e mediador mayornan ta trece na mesa e puntonan importante cu ta encera e criansa di nan yiu y e tema di vakantie, y biahe tambe ta topiconan cu ta wordo palabra. Ora mayornan tin claridad ariba e momentonan manera vakantie, compartimento di dia y mayornan acorda ariba e procedura di biahe cu muchanan, e ta preveni tension y discusion y ta duna claridad na mayor y yiu.
(*) Duna e mucha un voz: Muchanan mas grandi por tin deseo propio manera bai un camp, keda cu un amigo, of keda mas tempo na un di e mayornan. Scuchando e mucha, ta lague sinti cu su opinion tambe ta conta.
(*) Promove contacto continuo: Apesar cu den vakantie grandi tin mas tempo liber y flexibilidad, e mucha mester sinti e presencia di ambos mayor. Mantene e rutina crea y pensa na manda potret, yama regularmente, y inclui e otro mayor den e decisionan importante concerniendo boso yiu.
(*) No papia di asuntonan legal of financiero cu muchanan: Vakantie ta pa pasa un tempo ameno cu bo yiu(nan) y reconecta. No discuti cu nan kico e otro mayor a paga of no a paga, of cua ta e acuerdonan legal cu boso tin. Nan no mester sa e partinan aki.
(*) Respeta limite di otro: E mayor cu ken e mucha ta kedando serca dje ta tuma encargo di e yiu y su bienestar. Ora nan ta cu nan otro mayo, e persona ey ta maneha esaki. Lo ideal ta pa mayornan establece e reglanan comun, norma y balornan bou cua mayornan ta comparti e criansa y respeta e maneho na cada hogar, evita di pone e yiu(nan) den un situacion di tin cu scoge un banda. Esaki ta yuda yiunan pa sinti mas stabil den boso criansa comparti. Nan tin derecho pa stima boso tur dos.
(*) Corda di cuida bo mes: Si bo yiu(nan) ta di biahe cu nan otro mayor, e ta bo oportunidad pa reconecta cu bo mes. Priorisa tempo pa bo mes, haci cosnan cu bo ta gusta, y duna bo curpa y mente un momento di pauze. Practica di autocuido ta percura cu nos ta e mihor version di nos mes pa nos mes y nos yiu(nan).
Departamento di Plan di Mayor ta desea Muchanan y Mayornan un dushi vakantie: Plan di Mayor Aruba ta enfatisa cu vakantie grandi mester ta un temporada placentero y no uno di stress. Nos ta aki pa yuda famianan scucha otro, logra acuerdo, y pone e bienestar di e yiu na prome lugar. Pa mas informacion of asistencia por tuma contacto na e Loket Plan di Mayor Aruba, na di dos piso di MFA Santa Cruz.
