ORANJESTAD (AAN): Aki DIARIO ta trece algun reglamento importante, mirando cu a cuminza cu Copa Betico Croes 2026 den su fase di “Round of 16”.
Pa cu esaki, tur partido programa mester tin un ganador abase di e formato di e Torneo, e partido cu durante e tempo reglamentario keda empata, lo pasa directamente pa tironan penal (5x cada ekipo), si despues di e promer tanda di ehecucion di tironan penal ainda no tin un ganador, lo sigui efectua tironan penal “uno-uno” pa cada ekipo te na momento cu tin un ganador.
Esaki ta aplicabel durante Round of 16, Quart-Final y Semi-Final di Torneo Copa Betico Croes 2026.
DIARIO a compronde cu unicamente e partido final di Copa Betico Croes, cu e aña aki ta bay tuma lugar riba diabierna dia 13 di Februari 2026, si durante e tempo reglamentario e partido keda empata, lo hunga 2 x15 minuut ambos banda. Si durante e 2 x 15 minuut no tin un ganador, lo pasa pa ehecucion di tironan penal (penalty).
Manera tur aña pa loke ta entrada di Copa Betico Croes, AVB ta stipula e prijs di entrada pa tur Clubnan participante, ta informa cu esaki ta como lo siguiente. Adulto ta paga 5 Florin pa entrada. Muchanan bao 12 aña ta paga solamente 2 Florin. Esaki ta un empuhe enorme pa sigui carga y trece deporte di futbol mas cerca hubentud.
