Sandira Bislip, dietista di Healthy Lifestyle Center:
ORANJESTAD (AAN) – Sandira Bislip, Dietista na Healthy Lifestyle Center, den entrevista cu DIARIO a comenta cu consumi e productonan cu tin sucu agrega, den gran cantidad, no ta bon pa salud.
Bislip a señala cu e ta bira un adiccion, y mas sucu agrega e persona ta consumi, mas e curpa ta keda pidi p’e. E grupo cu mas ta preocupa e experto ta un edad masha jong ainda, door di su experiencia e ta wak muchanan di 4 aña bay ariba, ya caba tin problema cu sobrepeso y obesidad. Pues mas hoben cuminza evita esaki, miho ta pa e mucha, pero adulto mayor tin problema cu esaki tambe.
Healthy Lifestyle Center su meta ta pa concientiza e persona pa purba di kita e productonan cu tin sucu agrega den siete dia, y e ta bay ripara cu e ta sinti su curpa hopi miho, tin mas energia y un estilo di bida mas saludable ta habri p’e tambe, e Dietista sra. Bislip a subraya. E ta start su “healthy lifestyle e ora ey”.
Hopi persona cu tin sobrepeso of ta obeso, ta expresa cu nan no tin tempo pa move haci ehercicio of sikiera cana, pasobra nan ta hopi druk cu trabao, y tampoco ta haya tempo pa cushina saludable na cas.
Bislip a comenta cu hopi biaha e persona tin su prioridadnan robes. “Si bo kier pone enfasis riba bo salud, si bo kier biba saludable, yega na un edad halto, bo ta bay traha tempo pa por ehemplo, haci ehercicio of cushina bo cuminda saludable”, e Dietista Sandira Bislop, di Healthy Lifestyle Center, a señala.
