El a crea un Aruba nobo despues di destruccion economia mundial
*El a entrega Reino y mundo e prueba cu Aruba merece Status Aparte
*Aruba ta despedi di e mihor lider di Gobierno y defensor di autonomia
ORANJESTAD(AAN)—E forma legal di Status Aparte cu Betico Croes a presenta y logra den Reino. Autonomia financiero di Aruba, ta uno di e condicionnan sine qua non di Aruba, cu lo a separa na forma monetario for di Antia Hulandes, loke tambe tabata marca e sistema financiero independiente di Aruba den Reino Hulandes.
E factor monetario di Aruba poco biaha ta bini dilanti den e realidad di Status Aparte, pero tabata e factor principal pa Hulanda tabata sumamente cuidadoso cu compromisonan estatal, den cual Hulanda pa motibo di nacionalidad Hulandes di e ciudadano Arubano, ta keda directamente responsabel pa e bienestar di e Arubiano.
Pues e resultadonan di maneho di Aruba, ta central den e acuerdo entre Aruba y Reino Hulandes pa Status Aparte, cu a haya su inicio na momento cu e situacion petrolero mundial a conduci na ciere di Lago den porta di Status Aparte.
Pa Aruba por a sobrevivi, hipoteca a wordo introduci loke a percura pa entrada di proyectonan cu como parti di economia a alivia e condicion social di habitantenan di Aruba.
Sinembargo, ta a base di e concepto di “garantia”cu Aruba como pais a duna, a habri un economia nobo cu segun e plan original, tambe lo a depende di e desmantelacion di refineria.
Mientras Nel Oduber a pone fin na e desmantelacion di refineria cu despues na varios ocasion a sirbi economia, e debe di hipoteca tabata presente den e pot total di debenan di Aruba, cu lo a sigui crece y a bira intervencion Hulandes na 2014, ora Aruba a perde su Status Aparte a base di e debenan cu a wordo crea y tabata wordo crea, a pone Aruba bou supervision financiero di Hulanda.
Ora e promesa di rescata Aruba cu entrada di Cirgo tambe a fracasa, na 2017 mr. Evelyn Wever-Croes mester a acepta e responsabilidad pa un Aruba cu e Ministro Hulandes pa Asuntonan di Reino, a considera den estado di bancarota.
For di 2017, Aruba a conoce un cambio total di maneho pero tambe creacion di un mentalidad nobo, cu Aruba no por ta mendigo den Reino pero cu autonomia y e gobernacion propio di Aruba tabata na peligro y hasta a wordo afecta.
Ta den e situacion aki entrada di e experto den asuntonan financiero, e fiscalista mr. Evelyn Wever-Croes a haci su entrada y a bolter e sistema di gobernacion di Aruba, cu den pago di e interes riba debenan creciente, tabata perde oportunidad pa tin placa den caha pa traha na bienestar di e Arubiano.
Na 2020, mr. Evelyn Wever-Croes ya pagando e debe nacional, na careda mester a confronta e explosion mundial di Covid-19, cu a deshaci di tur normalidad na mundo.
Cu entrada di Covid-19 Aruba no tabata tin solamente un problema cu debe mas, pero Aruba a keda sin entrada y sin e base pa su entrada ya cu mester a cera porta di turismo, cu ta e productor principal di placa na Aruba.
Historia a reta Prome Ministro Evelyn Wever-Croes manera nunca el a reta un gobernante di Aruba, mientras ya Gobierno di Evelyn Wever-Croes mester a solucion e desastre financiero cu el a hereda.
Reino y mundo a aplaudi y te awe ta aplaudi e gobernacion y historico di Gobierno Evelyn Wever-Croes, cu awe ta despedi di Aruba pa entrega e mando na un coalicion nobo, cu mester duna continuacion na e maneho di Gobierno Evelyn Wever-Croes, manera Gobierno di Reino ta exigi.
Un gobierno nobo cu mester garantisa cu historia no ta ripiti pero cu Aruba ta keda cu e base financiero nobo crea pa Gobierno Wever-Croes pa tin placa pa traha na bienestar di tur Arubiano!
Aruba awe ta habri un epoca di incertumbre nobo cu sigur, ora mira atras riba loke na 2017 a keda atras pa Aruba, ta duna motibo grandi pa preocupacion.
Sinembargo, democracia ta dicidi. Pueblo di Aruba na urna electoral a duna preferencia na regreso pa pasado den cual e debe nacional a wordo crea y mester respeta decision di Pueblo.
Ora evalua gobernacion di Aruba for di Prome di Januari 1986 y haci un analisis financiero, economico y social a base di reglanan pa alcansa tal proposito, e salida di Gobierno mr. Evelyn Wever-Croes ta un momento special pa Aruba.
DIARIO, a base di un estudio profesional realiza cu e exigencianan di bon gobernacion financiero di e pais, hancra den Leynan di Aruba, awe mester proclama mr. Evelyn Wever-Croes, como e Gobernante sobresaliente di Aruba for di momento cu e pais a conoce su Status Aparte.
E cifranan y informacionnan basico cu mester sostene e posicion di DIARIO por wordo presenta na Pueblo di Aruba cu a conoce den persona di mr. Evelyn Wever-Croes un gobernante cu a duna contenido na e base legal di un gobernante segun e reglanan democratico di e leynan cu ta regla autonomia di Aruba y e Ley di Contabilidad cu ta regla con mester gasta placa di Pueblo.
Ta cu aplauso grandi DIARIO, cu su conocemento di leynan y sigur leynan administrativo di Aruba y a base di reglanan democratico internacional, ta despedi di e gobernacion di Prome Ministro Evelyn Wever-Croes, y ta proclama su persona e mihor gobernante, dirigente di Gobierno, cu Aruba a conoce for di entrada di su Status Aparte.
Danki pa excelente trabou!
