CARACAS: E compania Telefónica Venezolana (Movistar) a informa Diabierna 1 di Juli, cu nan lo bay stop di duna servicio di Satellite TV.
Nan a bisa cu e satellite riba cual nan tin e transpondernan pa asina nan por transmiti canalnan segun abono mensual of anual, esta ‘Satellite TV’, lo bay stop di ta disponible. Esey ta pone cu nan lo finaliza cu e tipo di servicio aki na final di 2022. Esey nan a skirbi den un boletin.
Movistar a bisa cu durante luna di April 2021, e compania a firma un deal cu e compania Hispasat cu a permiti nan prolonga nan servicio pa Veneszuela. Pero e desactivacion definitivo di e satelite a wordo confirma pa December di e aña aki.
Segun e Grupo Telefónica, loke a pasa cu e servicio di DTH Satellite (‘Direct-to-Home’) lo por pone nan pa bay haci un transicion digital pa tecnologianan mas evolucionario y eficiente.
Ya caba na Januari 2021 nan a trece nan plan pa renoba tecnologia di mira TV, y na Juni 2022 a presenta esey tambe na Brasil. Nan ta mirando cu tendencia na mundo ta pa TV via streaming di Internet. Pero esey ta implica inversionnan grandi den network di point-to-point, cu lo bay ta ambicioso pa un compania cu ta 100% depende di Mobile Data na Venezuela.
Movistar a bisa cu nan servicio di Celular cu Mobile Data lo sigui normal na Venezuela.
