ORANJESTAD (AAN): Danki na e app yama FIXI cu bo por download awor riba bo smartphone, hendenan a raporta un dump ilegal cu a ser crea door di hendenan sin escrupulo den un hanchi bunita na Sabana Liber na Noord.
Ora cu Bureau City Inspector a bay mira esaki, nan a keda asombra y alavez hopi desanima, cu esaki ta socede den distrito di Noord cu semper a mantene su mes como
un zona limpi.
City Inspector a bin descubri e sushedadnan aki den un berea mey-mey di matanan, y a topa cu tur tipo di sushi, di cas, di construccion, potchi di mata, potchi di WC, y hasta takinan gesnoei di Kukwisa. Anto den e area tin un cas cu 3 mata di Kukwisa su dilanti y tur tin taki recien gesnoei tambe. Pesey Inspectornan a cuminza cu un investigacion, pasobra tin indicacion cu ta bisiñanan mes a cuminza usa esaki como nan dump personal scondi.
Robby Rosel di Bureau City Inspector a indica cu a bin haya hopi potchi di mata cu ta yena cu awa, y por a mira hopi webo y larva di sangura den nan.
Segun Rosel, nan a mira esey den e potchi di WC bieu cu a ser benta eynan tambe a mira awa cu webo di sangura aden.
“E ta forma un peligro automaticamente tambe pa e bario,” Rosel a splica. “Bo ta mira con e awa a para y tin webo di sangura aden, como tambe den e blekinan di verf, blekinan di lechi cu tur ta acumulando awa y bira criadero pa sangura.”
Rosel a bisa cu esey no ta djis peligro pa Sabana Liber, pero full rond Aruba. Ban evita di laga sushedad acumula di bleki bieu, taira bieu, weya, etc., cu ta converti nan mes den criadero.
Tin hopi sangura ultimo dianan na Aruba, y pesey ta pidi cooperacion di comunidad pa mantene cura limpi pa asina reduci criadero di sangura, y evita di bira malo.
Bureau City Inspector ta trahando riba diferente solucion y medida pa evita cu hendenan ta sigui hisa benta sushi unda cu ta den naturaleza riba e isla. Esey ta inclui e autonan bieu cu ta ser laga atras.
Tur esaki ta poni den plannan grandi pa 2023, y segun Rosel, e lo inclui medida tambe pa esnan cu ta laga awa di poz bay pafo di nan tereno, sea riba caya of den tereno di otro hende. Tur esey lo tin medida mas severo planea pa wordo conecta na nan.
