Diego de Cuba di STA encuanto sueldo minimo:
- Aumento sueldo ta necesario pero haci na forma responsabel
ORANJESTAD (AAN): Ora di introduci salario minimo cu ta na nivel di bestaansminimum, autoridad mester ta cauteloso! Esey ta e direccion cu Diego de Cuba di Sindicato STA kier elabora riba dje.
Pasobra aumento di e salario minimo cu ta bira un suma basta grandi, bo ta bay crea e momento ey extra presion riba companianan chikito cu tin entre 5 pa 10 empleado. Nan lo bay cay bao di presion enorme pa cumpli cu e aumento, cu nan ta mira ningun otro forma pa ‘despacha’ dos of tres trahado.
Pasobra apart cu e negoshi tin di bay paga nan mas salario, e tin e ‘doorwerkingseffect’ riba riba tur e gastonan cu ta bay tin, cu tambe ta subi. Pues ta bay confronta un situacion ta con ta haci pa crea e balansa.
“E ta un necesidad pa e sueldo minimo por subi, pero bo mester ta hopi cauteloso,” e president di Sindicato STA a declara. El a agrega cu loke falta hopi na Aruba ta ‘control’.
“Nos falta di control y nos falta di vision, pa cuminsa crea Cooperativanan caminda cu e masa cu ta e trahadornan cu ta gana menos, por hinca nan mes den un Cooperativa grandi caminda nan por presiona reduccion di prijsnan di comestibel,” Diego de Cuba a enfatisa. El a bisa cu antes na Aruba tabatin e conocido Cooperativa yama ‘CORUBA’, como ehemplo, unda tabata presiona prijsnan abao. Cooperativa no ta bay pone un ganashi asina halto, aunke tin di paga trahadornan den e Cooperativa.
Segun De Cuba, e ta sigur cu ningun Gobierno no kier mira den direccion di Cooperativa pasobra nan tin miedo di haya guera cu comerciante- y banconan local. Anto awor Aruba ta para na e cruzada ey. E aumento di salario ta un necesidad? Si! Bo tin intencion di aumenta e salario? Si! Pero no mester lubida kico tur e cosnan aki a ocasiona dia cu a redobla pensioen, y cu e consecuencia a bin despues cu mester a hisa edad di pensioen na 65 aña.
Pues tin di tene cuenta, y studia e consecuencianan cu esaki lo por tin riba e comercio den su totalidad, y e doñonan di trabao! Hecho ta keda cu algo mester socede cu e salario, y no djis cu e hendenan cu ta cobrando sueldo minimo, pero esnan cu tin un sueldo un tiki mas halto cu esey, tambe tin di bay tene cuenta cu ne, pasobra tin hopi hende cu tin multiple añanan ta traha den compania pero cu no a conoce un aumento. Anto e cosnan aki, Sindicato STA ta mirando cu wowo skerpi.
Si un banda bo kier drecha salario minimo, no bay lubida riba e otro banda. “Bo tin di corda riba tur hende, pasobra e golpi cu e chikito ey ta haya, esun di clase media tambe ta haye, y kizas e tin mas shock-absorber pa absorba e golpi. Loke mester bin sigur na Aruba ta un control riba prijsnan.
Diego de Cuba cu tin un compania na Barcadera cu no sa cuanto miyones ta genera pa aña... y di con mester keda pega eynan? No por bin cu un otro Container Haven na San Nicolas? Unda tin competencia, unda e ora lo por yuda baha prijs unabez cu competencia yega na Aruba.
STA en principio ta di acuerdo pa hisa sueldo minimo, pero e tin di wordo haci na forma responsabel unda cu no ta bay trece companianan den situacion unda tin di bay despacha trahado for di servicio. Pasobra e ora bo ta alivia un problema, pero ta crea un otro. E ora tin di pensa si bo ta bon bezig, y STA ta insisti pa bin cu un dialogo riba e materia aki. E tin su proceso pa cana prome cu e yega asina leu.
