Parlamentario Darlaine Guedez-Erasmus (MEP)
ORANJESTAD (AAN): Parlamentario Darlaine Guedez- Erasmus di Fraccion di MEP a indica cu aña 2023 tabata un historico pa Aruba su turismo. 1.2 miyon turista 'stayover' y 817 mil turista crucero a bishita Aruba. Aki nos por mira cu Aruba sigur ta keda un isla hopi gusta pa turistanan bishita. Aki nos por mira cu turismo ta keda e driver di nos economia.
"Mirando tur e pronosticonan aki, mi persona durante e tratamento di presupuesto 2024 di pais Aruba cu a cuminsa desde 12 december 2023 y a ser aproba dia 18 december 2023 den Parlamento di Aruba a entrega 2 mocion cu tin di haber cu e servicio cu nos ta duna nos localnan y tambe nos bishitantenan ora di biaha.
Durante e reunion aki, mi persona a entrega 2 mocion na Minister di Turismo y Salubridad Sr. Dangui Oduber. E prome mocion ta unda mi persona ta urgi gobierno di Aruba pa sondea hunto cu Aruba Airport Authority N.V. e posibilidad pa instala un sala / y of un cabina priva y espacioso na Aeropuerto adapta specialmente na necesidadnan di e mamanan cu ta duna pecho y ta pomp lechi materno.
E otro mocion ta pa sondea e posibilidad pa pone un counter na Migracion di Aeropuerto specialmente pa personanan special cu ta posee di un (of mas) disabilidad visibel y invisibel y na pasaheronan cu tin necesidad di un asistencia special. Si e sondeo resulta factibel, pa implementa esaki den corto tempo.
E dos mocionnan aki, sigur lo yuda pa sigui mehora e servicio na aeropuerto y ta mustra cu Aruba su aeropuerto ta uno 'family-friendly'. Unda ta tene cuenta cu tur nos localnan y bishitantenan cu mas cu tin mester di adaptacionnan na e momento aki.
Na pueblo di Aruba, ban sigui demostra nos cordialidad y duna e hospitalidad na nos bishitantenan cu nos ta conoci p'e", asina Parlamentario di Fraccion di MEP, Darlaine Guedez-Erasmus a duna di conoce.
