ORANJESTAD (AAN) – “Mi tin cu para keto toch na e mocion di desconfianza contra mi, pasobra manera mi a splica den Parlamento,
un mocion di desconfianza ta un tool hopi importante cu Parlamento tin, pero bo no por use pa cualkier cos. Bo tin cu warde pa e momento cu ta realmente necesario y den caso di e mocion di desconfianza contra mi persona, tabata basa riba hechonan incorecto y mentiranan”, e mandatario a indica, den conferencia di prensa.
E ta haya lamentable cu e parlamentarionan, di cual tin varios den oposicion cu e mandatario sa cu nan ta tuma nan cosnan na serio, por a djis check of dobel check pa nan haya sa cu e hechonan ey no ta corecto.
E mandatario a splica cu e prome mocion contra su persona tabata pasobra e no a entrega Parlamento e maneho riba energia. Pero e por a prueba cu desde 2018 el a comparti esaki cu Parlamento; 2019, 2020 y 2021 pasobra e maneho aki ta algo cu e ta papia constantemente riba dje na Parlamento. El a agrega cu di su informe anual cu e ta publica cada aña, tambe a referi na dje.
Tambe nan a inclui un aspecto di SKOA den e mocion di desconfianza pa e hecho cu aña pasa e dignatario a sali na defensa di e personanan cu ta traha den limpieza (werksternan) y a evita pa nan wordo retira masalmente, na cierto momento, for di SKOA anto pesey nan a haya cu e mester haya un mocion di desconfianza.
“Eynan tambe mi a splica cu si mi a scucha e reunionnan bon di dia cu Minister Endy Croes tabata den Parlamento te dia cu ami a bin den Parlamento, e deseo di Parlamento casi den su totalidad tabata pa percura pa e personanan aki no perde trabao ainda na SKOA, debi na un discusion administrativo entre SKOA y gobierno”, e dignatario a relata.
El a sigui bisa cu e discusion administrativo aki awo ta wordo trata door di Minister Endy Croes, pa yega na un solucion cu SKOA pa asina dicidi kico ta locual e disputa administrativo aki ta duna como placa; ken debe ken placa pa e ora ey yega na un solucion. “Pero mientras cu e disputa administrativo ta andando no ta husto pa kita hende for di trabao, anto pesey aña pasa, na Juni, Conseho di Minister a tuma un decision di pidi SKOA no kita e werksternan y nos ta bay percura pa nos sali for di esaki. Esey ta locual cu nos a haci y aworaki Parlamento kier a manda mi cas pa e motibo ey. Y ora mi a splica nan cu si mi no a firma e carta aña pasa, tur e hendenan aki lo a wordo retira y awe no tabata tin nada di papia den Parlamento. Mi ta kere nan a realiza y e mocionnan aki a wordo vota en contra y a wordo bari for di mesa”, Minister Presidente a relata.
