ORANJESTAD (AAN): Misha Raymond, representante di Respaldo, a wordo invita pa presenta un discurso durante un conferencia na Corsou,
caminda e lo papia tocante salud mental di mucha y hoben, y e diferente factornan cu por contribui na pensamentonan suicida, intento di suicidio of yega na e decision tragico di kita su bida.
E conferencia lo tuma luga diahuebs 10 di september na University of Curaçao y ta wordo organisa pa Dutch Caribbean Mental Health Federation. E tema central di e conferencia ta “Suicide Prevention and Awareness”, un topico di gran importancia pa bienestar mental di muchanan y hobennan den nos comunidad.
Durante su presentacion, Raymond lo elabora riba diferente factornan social, emocional y ambiental cu por afecta salud mental di hobennan, y riba e importancia di reconoce señalnan di alerta y ofrece apoyo na tempo.
“Sea nos ta mayor, famia, amigo, docente of otro persona den comunidad, nos tur conoce of tin contacto cu un hoben pa kende e informacion aki por ta hopi importante y balioso. Tur hende por sigui e conferencia via e link cu ta disponibel riba pagina di Facebook di Respaldo,” señora Raymond a expresa.
