Ministro Wever y Minister Croes
- Cobranzanan di Februari 2023 ta violando regla
- Nan mester cambia e tarifa cu no a wordo aproba
ORANJESTAD (AAN): Den luna di juli di aña pasa WEB Aruba NV y NV Elmar a informa Gobierno di Aruba cu como consecuencia di e aumento di prijs di petroleo riba mercado internacional e prijs di awa y coriente mester worde aumenta.
Gobierno di Aruba a verifica tur calculo y cifra financiero y a duna un aprobacion di 6 luna pa aumenta e prijs di coriente, bao di condicion cu 1 februari 2023 mester re-evalua esaki, pues e aumento ta valido te cu 1 februari 2023. E aumento aki tabata necesario pa garantiza e suministro di awa y coriente na Aruba.
“Mirando cu no tin un aprobacion di Gobierno di Aruba pa un ahuste di e prijs di coriente pa e periodo despues di 1 februari 2023, e facturanan cu NV Elmar a emiti over e luna di februari 2023 ta den violacion di e concessievoorwaarden y nos a informa Elmar na varios ocasion di esaki atraves di varios carta cu mi a manda Elmar den nomber di mi mes como e minister encarga cu tarifa según e concessie y tambe den nomber di colega Minister Glenbert Croes cu ta encarga cu energia di Aruba”, segun Minister Geoffrey Wever a indica.
Diamars Minister Wever a suministra un carta den nomber di Minister Croes y Minister Wever na Elmar pa informa cu nan tin te cu diabierna awor 31 di maart, 2023 pa 12:00 pm pa bin cu propuesta financiero pa nos por establece e prijs di coriente desde 1 februari.
Prijs di coriente ta halto y ta afecta e costo di bida di tur nos ciudadanonan. Banda di esaki e ta un peso grandi pa gasto nan operacional di empresanan cu ta conduci inflacion directamente. Pa e motivo e no por ta asina cu un tarifa ta worde cobra cu no a worde aproba door di Gobierno di Aruba.
Minister Glenbert Croes di su banda tambe ta den dialogo continuo cu Utilities Aruba NV, WEB Aruba NV y NV Elmar pa varios siman caba y sa cu e empresanan ta trahando riba un propuesta pa Gobierno y ta confia cu pa diabierna e grupo di compania estatal lo cumpli cu demanda di Gobierno pa bin cu un propuesta nobo.
