ORANJESTAD (AAN): Riba Diamars, Aruba a honra e profesionalnan cu tur dia ta brinda cuido y
sosten na pashent y famianan cu nan conocemento, humanidad y compromiso. Ta trata di Dia di Nurse.
Nan ta un curason cu ta cuida, un man cu ta yuda, y un profesion cu ta inspira.
Ministerio di Salubridad, Asunto Social, Cuido di Adulto Mayor y Maneho di Adiccion ta expresa su aprecio sincero na tur nurse y profesionalnan di cuido pa nan entrega continuo y e impacto positivo cu nan tin den nos comunidad.
Danki pa traha cu dedicacion, pa e fortalesa den momentonan dificil y pa e cuido humano cu ta haci un diferencia real den bida di otro.
Relaciona cu Dia Internacional di Nurse, Ministro Wyatt-Ras a ricibi un bishita y presentacion di representantenan di Organizacion di Nursenan di Aruba (ODEA). Gobierno a indica cu nan ta balora y aprecia e aporte indispensabel di nos profesionalnan di enfermeria.
