Awor cu Gasoline Stations lo bay acepta cash solamente
ORANJESTAD (AAN): Ministro di Economia, Geoffrey Wever a bisa cu e tambe a tuma nota di e declaracion di Associacion di Gasoline Stations di Aruba, fecha 8 di juli 2022. Aki ta informa cu entrante Diaranzon 13 di juli 2022 nan no lo ricibi pago mas pa medio di tarheta di Maestro/Debit di banco.
Según Ministro Wever, esaki ta un situacion lamentable, mirando desaroyonan internacional di prijs di crudo, y e hecho cu ainda Aruba su economia ta den proceso di recuperacion, y tambe e hecho cu nos ta purbando di stimula mas digitalisacion dentro nos economia, cual ta encera mas pago online y menos cash, cual ta mas safe.
Dialuna binidero, Wever tin un reunion cu Aruba Bankers Association ("ABA"), y tambe ta buscando un reunion cu AGDA pa asina tambe scucha di nan banda.
“Nos mester keda realistico cu e realidad pa cual cu e margin di ganashi di gasoline stations ta fiho y regula pa ley, pa cual nan no tin manera pa desvia for di esaki ora ta yega na por ehempel cambia prijs. Tur subida di gasto ta afecta e operacion di gasoline stations y nan cashflow directamente, pa cual nos mester tene na cuenta nan descontento.”
Si ta papia di absorba e gasto, esaki ta nifica un cos, prijs lo subi. Pesey mes Ministro ta kere e "timing" di tuma e decision aki ta uno no faborabel pa pueblo.
Di parti di ministerio di asuntonan economico, nan lo haci tur cos na nan disposicion pa facilita y yuda trece un resolucion na e situacion aki pronto, caminda ambos partido por sali di acuerdo, y ta minimalisa cualkier efecto negativo pa pueblo.
